१८ असाेज, एजेन्सी ।
बंगलादेशले साफ च्याम्पियनसिप २०२१ मा भारतलाई १–१ को बराबरीमा रोकेको छ । साेमबार माल्दिभ्सकाे नेसनल स्टेडियममा भएको खेलमा १० खेलाडीमा सीमित बंगलादेशले भारतलाई बराबरीमा रोकेको हाे ।
यो नतिजापछि बंगलादेश दुई खेलबाट चार अंकसहित लिग तालिकाको शीर्ष स्थानमा कायम रह्यो । भारत भने १ अंकमा तेस्रो स्थानमा रह्यो । यस खेलसँग प्रतियोगितमा सहभागी प्रत्येक टिमले कम्तीमा एक खेल खेलेका छन् । नेपाल तीन अंकसहित दोस्रो स्थानमा छ ।
नेसनल स्टेडियममा भएको खेलमा बंगलादेशले ७४ औं मिनेटमा गोल फर्काएको हो । उसका लागि यासिन अराफातले गोल गरे र खेल बराबरीमा टुंगियो । खेलको पहिलो गोल भारतका लागि सुनिल क्षेत्रीले गरे । उनले २६ औं मिनेटमा उडन्तसिंह कुमनले मिलाएको पासमा नजिकको दूरीबाट गोल गरेका थिए ।
खेलको ५४ औं मिनेटमा बंगलादेशका विश्वनाथले भारतका सुभाषिश घोषलाई लडाउँदा सिधा रातो कार्ड खाँदै बाहिरिएका थिए ।
तर, भारतले एक खेलाडी बढी भएको अवसरका फाइदा उठाउन सकेन र बराबरीमा चित्त बुझाउन बाध्य रह्यो । बंगलादेशले सन् २००३ यता भारतलाई हराउन भने सकेको छैन ।
सोमबारको दोस्रो खेलमा नेपालले श्रीलंकाको सामना गर्दै छ । नेपालले आफ्नो पहिलो खेलमा माल्दिभ्सलाई हराएको थियो ।
