काठमाडौं, साउन ११
राष्ट्रिय चिकित्सा शिक्षा विधेयक संघीय संसदमा पेस भएको छ । आज बसेको प्रतिनिधिसभाको दोश्रो बैठकमा शिक्षा, विज्ञान तथा प्रविधिमन्त्री गिरिराजमणि पोखरेलले विधेयक प्रस्तुत गरेका हुन ।
विधेयकमाथि सांसद गगनकुमार थापा, प्रेम सुवाल र सरिता गिरीको विरोधको सूचना परेका थिए । विरोधको सूचनाको प्रस्तावका बारेमा बोल्दै नेपाली कांग्रेसका सासंद गगन थापाले कांग्रेसको सदन संघर्षका कारण डाक्टर गोविन्द केसीको माग पुरा गर्न सरकार बाध्य भएको बताए ।
निरन्तरको संसद बैठक अवरुद्ध संगै सडकमा बढ्दै गएको सरकार विरोधी आवाज पछि अन्तत सरकारले डाक्टर केसीका माग सम्बोधन गरेको टिप्पणी उनले गरे ।
प्रतिनिधिसभाको अर्को बैठक आगामी बुधबार बिहान ११ बजेका लागि बोलाईएको छ । यसैबीच, संचारकर्मीलाई संक्षिप्त प्रतिक्रिया दिदै नेपाली कांग्रेसका सांसद मिनेन्द्र रिजालले सहमति संसदमा टेबल भएपछि आफुहरुले दोश्रो बैठक संचालन गर्न दिएको प्रतिक्रिया दिएका छन ।
नेकपाका प्रमुख सचेतक देव गुरुङ्गले डाक्टर केसी संग गरिएका सहमतिलाई मन्त्रीपरिषद् बैठकमार्फत अघि बढाई संसदीय प्रक्रियामा प्रवेश गराएर विधेयकमा समावेश गरिने बताए ।
विधेयकमाथिको सैद्धान्तिक छलफल सकिएपछि सरकारले डाक्टर केसीसंग गरेका सहमतिका बुँदाका आधारमा विधेयकमाथि संसोधन प्रस्ताव दर्ता गराउने छ ।
