२६ असाेज, बेलग्रेट ।
परराष्ट्रमन्त्री डाक्टर नारायण खड्काले नेपाल असंलग्न परराष्ट्र नीतिको सिद्धान्तप्रति कटिबद्ध रहेको बताएका छन् । असंलग्न राष्ट्रहरुको आन्दोलन (नाम)को ६० औ स्थापना दिवसका अवसरमा सर्वीयको राजधानी बेलग्रेटमा आयोजित २ दिने उच्चस्तरीय सम्मेलनलाई सम्बोधन गर्दै मन्त्री खड्काले कुनैपनि देशको स्वतन्त्रता र सहिष्णुताको नेपालले उच्च सम्मान गर्ने जानकारी दिए।
भगवान गौतमबुद्ध र सगरमाथाको देश नेपालले विश्वमा शान्ति र भाइचारा कायम गर्न राष्ट्रसंघ मार्फत महत्वपूर्ण भूमिका निर्वाह गर्दै आएको स्पष्ट गरे । हाल विश्वमा बढ्दै गएको आणविक हातहतियार उत्पादनको होडवाजी सबै सदस्य राष्ट्रकै लागि चिन्ताको विषय भएको मन्त्री खड्काले उल्लेख गरे । कोभिड- १९ को महामारीले विश्वलाई नै आक्रान्त पारेको वर्तमान समयमा सदस्य राष्ट्रहरुबीच आर्थिक सहयोग र साझेदारी अझ अपरिहार्य रहेको मन्त्री खड्काले बताए।
नेपाली जनतालाई कोरोना संक्रमणबाट जोगाउनु नेपाल सरकारको पहिलो प्राथमिकता रहेको जानकारी दिंदै परराष्ट्रमन्त्री खड्काले यस अभियानमा विश्व स्वास्थ्य संगठन लगायत विभिन्न मुलुकबाट प्राप्त सहयोगको सराहना पनि गरे ।
आतंकवाद, भोकमरी र जलवायु परिवर्तनको असर न्यूनिकरण विश्वकै साझा समस्या र सरोकार भएको उल्लेख गर्दै मन्त्री खड्काले यी चुनौतिहरुको सामनाका लागि साझा कार्ययोजना र प्रतिबद्धता आवश्यक रहेको बताए ।
