१ असाेज, काठमाडौं ।
नेपाली फुटबल टोलीका डिफेन्सिभ मिडफिल्डर रोहित चन्द माल्दिभ्सबाटै इन्डोनेसिया प्रस्थान गरेका छन् । साफ च्याम्पियनसिप फुटबलमा उपविजेता बनेको नेपाली राष्ट्रिय फुटबल टोली सोमबार नेपाल आइपुगेको छ । तर, राेहित नेपाल फर्किएकाे टाेलीमा छैनन् ।
उनले सामाजिक सञ्जालबाट इन्डोनेसिया प्रस्थान गरेको जनाएका छन्। रोहित इन्डोनेसियामा जकार्ता पर्सिजाबाट ब्यावसायिक फुटबल खेल्दै आएका छन्। इन्डोनेसियाको अहिले शीर्ष डिभिजनको लिग चलिरहेको छ । उनी साफ च्याम्पियनसिप फुटबलका लागि इन्डोनेसियाबाट सिधै माल्दिभ्स आएका थिए ।
रोहित नेपालका लागि सर्वाधिक खेल खेल्ने दोस्रो खेलाडी हुन् । साफ च्याम्पियनसिपको फाइनलमा भारतविरुद्धको खेलसँगै रोहित सर्वाधिक खेल खेल्ने दोस्रो खेलाडी बनेका हुन् । रोहितले पूर्वकप्तान विराज महर्जनलाई उछिन्दै सर्वाधिक क्याप जित्ने दोस्रो खेलाडी बनेका हुन् ।
२९ वर्षीय रोहितले नेपालका लागि ७४ क्याप खेलेका छन् । विराजले नेपालका लागि ७३ खेल खेलेका छन् । नेपालका लागि सर्वाधिक खेल खेल्ने कीर्तिमान भने कप्तान तथा गोलरक्षक किरण चेम्जोङको नाममा छ । किरणले ७९ खेल खेलेका छन् ।
नेपाली टोलीका मुख्य प्रशिक्षक अब्दुल्लाह अलमुताइरी पनि नेपाल आएनन्। अलमुताइरी माल्दिभ्सबाटै कुवेत गएका हुन्। त्यहाँ उनी परिवारसँग केही समय बिताएर नेपाल फर्किने अखिल नेपाल फुटबल संघ (एन्फा) स्रोतले जनाएको छ । माल्दिभ्समा आयोजना भएको १३औं संस्करणको साफ च्याम्पियनसिप फुटबलमा उपविजेता बनेर स्वदेश फर्किएको नेपाली टोलीलाई विमानस्थलमा भव्य स्वागत गरिएको छ ।खेलाडीको स्वागतका लागि युवा तथा खेलकुदमन्त्री महेश्वर गहतराज आफैं विमानस्थल पुगेका थिए ।
