३ कात्तिक, इटहरी ।
इटहरी उपमहानगरपालिकाको आकस्मिक कार्यपालिका बैठकले वाढी पीडितको राहत र उद्धारमा कुनै कसर बाँकी नराख्ने निर्णय गरेको छ । बैठकले उपमहानगरपालिकाका जनप्रतिनिधि,कर्मचारी र शिक्षकले सात दिनको पारिश्रमिक विपद राहत कोषमा जम्मा गर्ने निर्णय गरेको नगरस्तरीय विपद ब्यवस्थापन समितिका सदस्य सचिव पुष्प चौधरीले जानकारी दिए ।
नगरप्रमुख द्वारिकलाल चौधरीले एक महिनाको तलब जम्मा गर्ने घोषणा गरेका छन् । कार्यपालिकाको वैठकले वाढीका कारण इटहरीमा ज्यान गुमाउनेका परिवारलाई किरिया खर्च बापत २५ हजार उपलब्ध गराउने निर्णय गरेको छ । यसैगरी वडाहरुमा पीडितका लागि लत्ता कपडा र मेस सञ्चालन गर्न सवै वडालाई एकलाखका दरले पेश्की उपलब्ध गराइने भएको छ । वाढीले भत्काएका बाटो,कल्भर्ट तत्काल मर्मत गरिने भएको छ ।
वैठकद्वारा उद्धार तथा राहत कार्यमा जुटन सम्पूर्णमा आग्रह गरिएको छ । यसअघि दिउँसो वंैक तथा वित्तीय सस्थाहरुसँगको वैठकमा वैक तथा वित्तीय सस्थाहरुले राहतकोषमा सहयोग गर्ने प्रतिवद्धता जनाएका छन् । बैठकमा नगरप्रमुख द्धारिकलाल चौधरीले बाढीपीडितहरुका लागि सहयोगका लागि बैंक तथा वित्तीय सस्थाहरुका प्रतिनिधिहरुलाई आग्रह गरेका थिए ।
