१२ कात्तिक, चितवन ।
पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले केपी शर्मा ओली प्रधानमन्त्री हुँदा बालुवाटारस्थित निवास दरबारजस्तो बनाइएको र विदेशबाट महँगा-महँगा सामान ल्याएर प्रयोग गरेको बताएका छन् ।
आफू पहिलोपटक प्रधानमन्त्री हुँदा डेढ लाखको खाट प्रयोग गर्यो भनेर हल्ला चलाइएको तर ओलीले थाइल्याण्ड, इटलीलगायत देशबाट अरबौं करोडौंको सामान ल्याएर प्रयोग गरेको उनको भनाइ छ ।
शुक्रबार भरतपुर महानगर कमिटीको कार्यक्रममा बोल्दै उनले भने, ‘म प्रधानमन्त्री बनेका बेला डेढलाखको खाटमा सुत्यो भनेर प्रचार गरियो, त्यो खाट मैले किनेको थिइन, त्यो खाट भाँच्न पनि भएन । ओलीले राजा ठानेर राजकीय जीवन विताउन दरबार बनाउन लागेका रहेछन ।’
विदेशबाट महँगा सामान ल्याएर प्रयोग गरिएकोबारे गठबन्धनमा छलफल भएको भन्दै प्रचण्डले त्यो सार्वजनिक हुँदै जाने पनि बताए । यसअघि प्रचण्डले भने, ‘थाइल्याण्ड, इटाली, रोमबाट यति महँगा महँगा सामान ल्याएर त्यहाँ थुपारेको रहेछ हेर्नुस् । त्यो देख्दा अरु त अरु शेरबहादुर देउवाले जिब्रो टोक्नु भाछ रे । नुहाउनका लागि ल्याएको अरबौं, करोडौंको छ ।’
राजा ठानेर दरबार बनाउन खोज्ने र विलासिताका सामान ल्याउने ती प्रधानमन्त्रीलाई चिनेर जनताले सजाय दिनुपर्ने प्रचण्डको माग छ । ओलीको हातबाट केन्द्र सरकार गुमिसकेपछि अब छिट्टै सबै प्रदेश सरकारहरू पनि गुमाइदिने उनको भनाइ छ ।
