२२ कात्तिक, काठमाडाैँ ।
चाहे विज्ञानको क्षेत्र होस् वा कलाको । सामाज सेवा होस्,ब्यापार वा सुरक्षाको मामिला । विभिन्न क्षेत्र तथा विधामा धेरै नेपालीहरुले आफ्नो र देशको नाममा इतिहास रच्दै आएका छन् । आफनो काम र विद्धताकै बलमा धेरै नेपालीले नेपालको प्रतिष्ठा अझ उचो बनाइरहेका छन् ।
विश्वमा बढी मात्रामा साहसीको उपमा पाउने नेपालीले कुनैपनि क्षेत्र र विधामा अवसर पाए भने आफूलाई अब्बल सावित गर्न सक्छन् भन्ने दर्जनौ उदाहरण बनिसकेका छन् । विश्वमै नेपालीका नाममा दजनौं कीर्तिमान बनिसकेका छन् । यही सूचीमा अर्काे एउटा नाम फेरि थपिएको छ । संयुक्त राष्ट्रसंघको शान्ति मिसनमा कार्यरत नेपाली चेली प्रहरी उपरीक्षक (एसपी) संज्ञा मल्ल पनि परेकी छिन् ।
संयुक्त राष्ट्रसंघले संज्ञा मल्ललाई ’वर्ष महिला प्रहरी –२०२१’ अवार्ड प्रदान गर्ने भएको छ । मल्ल अफ्रिकी राष्ट्र कंगोमा संयुक्त राष्ट्र संघीय मिसनमा कार्यरत छिन् । मल्ल राजधानी किन्सासामा रहेको मिसनको मुख्यालयमा जनस्वास्थ्य तथा वातावरण इकाई प्रमुख हुन् । राष्ट्रसंघले जारी गरेको विज्ञप्तिमा इबोला र कोभिड–१९ को महामारी तथा गत मे महिनामा भएको ज्वालामुखी विस्फोटसहितको प्राकृतिक प्रकोपमा मल्लले खेलेको भूमिकालाई सो अवार्ड प्रदान गरिएको उल्लेख छ ।
मल्लले नेतृत्व गर्ने ईकाईले राष्ट्रसंघमा कार्यरत कर्मचारी र स्थानीय बासिन्दालाई स्वास्थ्य सम्बन्धी सावधानीको मापदण्ड सचेत गराउँदै आएको छ ।उनलाई २३ कात्तिकमा संयुक्त राष्ट्रसंघका महासचिव एन्टेनियो गुटरेसले पुरस्कार प्रदान गर्ने बताइएको छ ।
