४ मंसिर, काठमाडौं ।
नेपाली राष्ट्रिय फुटबल टोलीका कप्तान किरण चेम्जोङले माल्दिभ्सको शीर्ष डिभिजन क्लब माजिया स्पोर्ट्स एन्ड रिक्रिएसन क्लबबाट खेल्ने भएका छन् । किरणले शनिबार क्लबसँग एक सिजनका लागि सम्झौता गरेका हुन् ।
यसअघि माल्दिभ्सकै टिसी स्पोर्ट्सका लागि खेल्दै किरणले लिग उपाधिसँगै उत्कृष्ट गोलरक्षक घोषित भएका थिए । किरणकै कप्तानीमा नेपालले गत महिना माल्दिभ्समा भएको साफ च्याम्पियनसिपमा पहिलो पटक फाइनल यात्रा तय गरेको थियो ।
किरणले यसअघि भारतको राउन्डग्लास पन्जाबको कप्तानी गरेका थिए । त्यसअघि मिनेर्भा पन्जाबबाट आइलिग जितेका उनी त्यहाँ पनि उत्कृष्ट गोलरक्षक घोषित भएका थिए ।
