६ मंसिर, काठमाडौं ।
प्रधानन्यायाधीश चोलेन्द्र शमशेर राणाविरुद्ध आन्दोलनरत नेपाल बार एसोसिएसनले नेकपा एमालेलाई ज्ञापनपत्र बुझाएको छ। प्रधानन्यायाधीश राणामाथि महाभियोग लगाउन र न्यायालय सुदृढीकरणको माग गर्दै बार एसोसिएसनले सोमबार नेकपा एमालेका संसदीय दलका उपनेता सुवास नेम्वाङलाई ज्ञापनपत्र बुझाएको हो।
ज्ञापनपत्र बुझ्दै पूर्वसभामुख समेत रहेका नेता नेम्वाङले सर्वोच्च अदालतको विवादको मुद्दा भित्र नै समाधान गरिनुपर्ने सुझाव दिएका छन् । यद्यपि यसबारे पार्टीमा आफ्नो धारणा राख्ने नेम्वाङले आश्वासन दिएका थिए ।
उनले बार सम्बद्ध कानुन व्यवसायीहरूमाथि प्रहरीले बल प्रयोग गरेकोमा दुख व्यक्त गरेका थिए । ‘तपाइँहरूमाथि बल प्रयोग भएकोमा दुख व्यक्त गर्दछु । त्यस्तो नहुनुपर्थ्यो,’ बारको टोलीका सदस्यहरूसंग नेम्वाङले भनेका थिए ।
प्रधानन्यायाधीश राणाले तत्काल राजीनामा दिनुपर्ने मागसहित नेपाल बार एसोसिएसनले शुक्रबार एकहप्ते आन्दोलनका कार्यक्रम घोषणा गरेको थियो। जस अन्तर्गत बारले आज संसदमा प्रतिनिधित्व गर्ने पार्टीहरूका साथमा सभामुखलाई ज्ञापनपत्र बुझाएको छ।
यसअघि दिउँसो २ बजे सभामुख अग्नि सापकोटालाई ज्ञापनपत्र बुझाएपछि बारको टोलीले नेम्वाङलाई ज्ञापनपत्र बुझाएको थियाे ।
