१० मंसिर, काठमाडौँ ।
पूर्ण खोप लगाएका सबै प्रकारका भिसा वाहकका लागि आफ्नौ अन्तराष्ट्रिय सीमा खोलेको अष्ट्रेलियन सरकारले अस्थायी भिसा वाहकका लागि पनि आवेदन खोल्ने निर्णय गरेको छ । कोभिडका कारण लामो समयदेखि सिमा बन्द हुँदा भिसा अवधि सकिएर अष्ट्रेलियामै फसेका वा बाहिर मुलुकमा रहेका ४८५ (टेम्पोरेरी ग्राजुयट) भिसावाहकलाई अस्ट्रेलियन सरकारले पुनः भिसा आवेदन गर्न पाउने व्यवस्था मिलाएको छ ।
अन्तर्राष्ट्रिय सीमा बन्द हुँदा विदेशमा फसेका ४८५ अस्थायी भिसा वाहक (टीआर)को अधिकार कतौटी भएको महशुस गर्दै सरकारले यो कदम चालेको बताइएको छ । ४८५ अर्थात टेम्पोरेरी ग्राजुयट भिसा भर्खरै स्नातक सकाएका अन्तर्राष्ट्रिय विद्यार्थीलाई अस्ट्रेलियामा काम जारी राख्न प्रदान गरिने भिसा हो। जसबाट उनीहरूलाई पढाइपछि अर्थोपार्जन र विषयगत दक्षतामा काम गर्ने अवसर पाउँछन् ।
२१ महिना अन्तर्राष्ट्रिय सिमा बन्द हुँदा विभिन्न मुलुकमा फसेका भिसाधारीले आफूले पाएको कामको अधिकार गुमाउने भएकोले सरकारले उनीहरूका लागि मौका दिएको हो । हाल अस्ट्रेलियामा अध्यनरत करिब तीस हजार अन्तर्राष्ट्रिय विद्यार्थीको टीआर भिसाको समयावधि सकिन लागेको छ । स्नातक तहको पढाई सकिएपछि प्राप्त हुने यो अवसर गुमाएका हजारौं अन्तर्राष्ट्रिय विद्यार्थी देश बाहिर रहेकोले अस्ट्रेलिया आउन नपाएका वा फसेकाले यो अवसरका लागि पुनः आवेदन दिन पाउने भएका हुन् ।
संघीय सरकारको निर्णय अनुरूप वर्तमान भिसावाहक वा सन् २०२० को फेब्रुअरी १ तारिख वा त्यसपछि भिसा समाप्त भएका मानिसलाई भिसा पुनः प्राप्त गर्न आवेदन दिन अनुरोध गरिएको छ । उनीहरूले उक्त भिसाको अवधि बराबर समयका लागि भिसाको आवेदन हाल्न पाउनेछन् । अन्तर्राष्ट्रिय विद्यार्थीका लागि टेम्पोररी ग्राजुएट भिसा सम्बन्धी केही प्रमुख परिवर्तनमा मास्टर्स कोर्स वर्कको टेम्पररी ग्राजुयट भिसा अन्तर्गत अस्ट्रेलियामा बस्न र काम गर्न पाउने समयलाई बढाएर दुईबाट तीन वर्ष पु¥याइने भएको छ । यो नियम सन् २०२१ डिसेम्बर १ तारिखदेखि लागू हुनेछ ।
यस्तै पोष्ट ग्राजुएटको टीआर भिसामा काम गर्न पाउने समय १८ महिनाको सट्टा २४ महिनासम्म बढाइएको छ । यसबाहेक नयाँ नीतिमा अस्ट्रेलिया बाहिर बसेर गरेको पढाइको समयलाई पनि गणना गर्न विद्यमान उपायको प्रयोग गरिने बताइएको छ । यसअघि सरकारले पूर्ण खोप लगाएका दक्ष आप्रवासी, अन्तर्राष्ट्रिय विद्यार्थी र मानवीय भिसा वाहकहरू डिसेम्बर १ तारिखदेखि अस्ट्रेलिया आउन पाउने निर्णय गरिसकेको छ।
