२३ मंसिर, काठमाडाैँ ।
लमजुङमा शिक्षक, विद्यार्थी चढेको जिप पल्टिँदा ३ जनाको मृत्यु भएको छ । दुर्घटनामा ९ जना घाइते भएका छन् । मर्स्याङ्दी गाउँपालिका- २ मा रहेको गणेश माविका शिक्षक, विद्यार्थी ‘पिस हिल’ भन्ने ठाउँतिर शैक्षिक भ्रमणका लागि जाँदै गर्दा ग१ज ६३१७ नम्बरको जिप साेही गाउँपालिका-८ भुस्मेमा दुर्घटनामा परेको हाे ।
घटनाको विस्तृत जानकारी आउन बाँकी नै रहेको लमजुङका प्रमुख जिल्ला अधिकारी सुशील वैद्यले बताए । उनले भने, ‘शिक्षक, विद्यार्थी मिलेर तीन वटा जिपमा पिस हिल भन्ने ठाउँमा शैक्षिक भ्रमणका लागि जाँदै गरेका थिए । त्यसमध्ये एउटा जिप दुर्घटना हुँदा एक जना विद्यार्थी, एक शिक्षक र एक स्थानीयको मृत्यु भएको खबर प्राप्त भएको छ । ९ जना घाइते भएको र त्यसमध्ये २ जनालाई चितवन उपचारका लागि पठाइएको छ भने ७ जनाको जिल्ला अस्पताल लमजुङमा उपचार भइरहेको छ ।’
घटनास्थलमा प्रहरी भइरहेको र स्थानीयले घाइतेको उद्धार गरेको उनले जानकारी दिए । जिपमा १६ जना सवार थिए ।
