२५ मंसिर, काठमाडौं ।
कतार एअरवेज सहिद स्मारक ‘ए’ डिभिज लिगमा नव प्रवेशी सातदोबाटो युथ क्लबले पहिलो हार बेहोरेको छ । त्रिपुरेश्वरस्थित दशरथ रंगशालामा शनिबार भएको खेलमा सातदोबाटो न्युरोड टिम (एनआरटी) सँग १–० ले पराजित भएको हो ।
खेलको १६औं मिनेटमा आकाश बुढामगरको फ्रिकिकलाई एनआरटीका डिफेन्डरले क्लियर गर्दै बचाए । ३९औं मिनेटमा एरिक विष्टको पेनाल्टी बक्सबाहिरको प्रहार पिटर सेगुनलाई लाग्दै बाहिरियो ।
४४औं मिनेटमा स्टेफन समिर विनोङको प्रहारलाई सातदोबाटोको कप्तान मान बहादर तामाङले बचाउँदा एनआरटी अग्रता लिनबाट चुक्यो । दोस्रो हाफको बल चलेको १५ सेकेन्डमै स्टेफन समिर विनोङले गोल गर्दै एनआरटीलाई १–० को अग्रता दिलाए । करण रावतको मिस पासलाई मेसुके ओलुमोउले नियन्त्रणमा लिदै दिएको पासमा स्टेफनले सहजै जाली चुमाएका थिए ।
५९औं मिनेटमा स्टेफन समिरको प्रहारलाई गोलरक्षक अभिषेक बरालले पञ्च गर्दै बचाए । ६७औं मिनेटमा दिपेश घलेको पेनाटी बक्सबाहिरको प्रहार पोस्ट नजिकैबाट आकासिदा एनआरटी अग्रता लिनबाट चुक्यो । ८३औं मिनेटमा अजायी मार्टिन्सको क्रसलाई विवेक गुरुङले क्लियर गर्दै बचाए ।
हारसँगै सातदोबाटोले शीर्षस्थानमा उक्लने मौका गुमाएको छ ।
