८ पुस, एजेन्सी ।
भारतीय प्रधानमन्त्री नरेन्द्र मोदीले कोभिड–१९ को नयाँ भेरियन्ट ओमिक्रोन संक्रमणका विषयमा समीक्षा बैठक गर्ने भएका छन् ।
भारतीय सञ्चारमाध्यमले जनाएअनुसार भारतमा अहिलेसम्म १७ राज्यमा कोभिड–१९ को नयाँ भेरियन्ट ओमिक्रोन फैलिएको छ । संक्रमण तीव्रगतिमा फैलिँदै गएपछि प्रधानमन्त्री मोदीले बिहीबार सम्बन्धित अधिकारी लगायतसँग समीक्षा बैठक गर्न लागेका हुन् ।
भारतमा हालसम्म २३८ जनामा ओमिक्रोनका संक्रमण पुष्टि भएको छ । यसैलाई मध्यनजर गर्दै सरकार पनि अलर्ट मोडमा आएको सञ्चारमाध्यमले जनाएका छन् ।
नयाँ वर्ष मनाउनुअघि आज हुने समीक्षा बैठकले थप कडाइ गर्न सक्ने देखिएको छ । यसतर्फ प्रदेश सरकारले पहल सुरु गरेको छ । प्रधानमन्त्री मोदीले आज हुने समीक्षा बैठकमा ओमिक्रोनका विषयमा कडा निर्देशन दिन सक्ने बताइएको छ ।
यसअघि कोरोना संक्रमण रोक्न भारतको केन्द्र सरकारले सबै राज्यमा पत्र मार्फत निर्देशन दिइसकेको छ । केन्द्रीय स्वास्थ्य सचिव राजेश भूषणले लेखेको पत्रमा परीक्षण र निगरानी बढाउन, रातमा कर्फ्यू लगाउने, ठूला जमघटमा प्रतिबन्ध लगाउने सुझाव दिइएको छ ।
यस्तै केन्द्र सरकारले संक्रमित बढ्दै गएका राज्यमा अस्पतालमा सुविधा बढाउन आवश्यक कदम चाल्न सुझाव दिइसकेको छ ।
