१५ माघ, विराटनगर ।
नोवेल मेडिकल कलेज शिक्षण अस्पतालमा एम.बी.बी.एस मा भर्ना भएका विद्यार्थीहरुको शुल्कका विषयमा आन्दोलनरत विद्यार्थी संगठनसंग भएको सहमतिअनुसारको कारबाही प्रक्रिया अगाडी बढाउन जिल्ला प्रशासन कार्यालय मोरंगले सम्बन्धित मन्त्रालयलाई सिफारिस गरेको छ ।
२०७८ माघ ७ गते प्रमुख जिल्ला अधिकारी काशी राज दाहालको संयोजकत्वमा आन्दोलनरत विद्यार्थीहरुसंग वार्ता भएको थियो । तत्पश्चात विद्यार्थीहरुले आन्दोलन फिर्ता लिएका थिए ।
उक्त वार्तामा कलेजले लिएका अतिरिक्त शुल्क फिर्ता गर्ने, स्वेच्छिक होस्टल हुने तथा आन्दोलनका क्रममा विद्यार्थीमाथि भएको आक्रमणका दोषिलाई कारबाही गरिने विषयमा विद्यार्थी संगठन र समितिको बीचमा सहमति भएकोे थियो ।
विद्यार्थीहरुले शान्तीपुर्ण आन्दोलन गर्दा सगरमाथा र विराट गोर्खा सेक्युरिटीका सुरक्षाकर्मीले उनीहरुमाथि बल प्रयोग गरेका थिए । सुरक्षाकर्मीहरुले आन्दोलनरत विद्यार्थीमाथि लठ्ठी प्रहार गर्दा विद्यार्थीहरु घाइते भएका थिए ।
शान्तीपूर्ण आन्दोलन गर्दा यसरी विद्यार्थीहरुमाथि अनधिकृत रुपमा लठ्ठी प्रयोग गरि सांघातिक आक्रमण भएको र सो कार्य कानून विपरित भएकाले उक्त कम्पनीलाई आवस्यक कार्यवाहीका गर्न जिल्ला प्रशासन कार्यालयले उद्योग वाणिज्य तथा आपूर्ती मन्त्रालय अन्तर्गतको कम्पनी रजिष्ट्रार कार्यालयलाई पत्र पठाएको हो ।
