३ चैत, विराटनगर । स्थानीय तहको निर्वाचन नजिकिएसँगै दलहरुको आफ्नो निर्वाचन अभियानलाई तीव्रता दिएका छन् । दलहरु आआफ्ना रणनीतिका साथ चुनावी मैदानमा उत्रिदा सत्तारुढ दलबीच भने चुनावी तालेमलका विषयमा अझै दुविधा देखिएको छ ।
खास गरी चुनावी तालमेलका विषयमा सत्तारुढ दलका शीर्ष नेताहरुबीच समझदारी बनेपनि नेपाली कांग्रेसका दोस्रो तहका नेताहरुले तालमेलका विषयमा असन्तुष्टि जनाइरहेका छन् ।
लगातार कांग्रेस भित्रबाट तालमेलको विरोध भएपछि तालमेलका लागि अथक प्रयास गरिरहेको नेकपा माओवादी केन्द्रले कांग्रेससँग तालमेल नभए नेकपा एमालेसँग समेत तालमेल हुन सक्ने संकेत गरेको छ ।
माओवादी केन्द्रका अध्यक्ष पुष्पकमल दाहाल ‘प्रचण्ड’ ले चुनावमा माओवादीसँग गठवन्धन गर्नेबारे कांग्रेसका केही नेता अतिवादी बनेको गुनासो गर्दै प्रतिपक्षी एमालेसँग तालमेलको सम्भावना कांग्रेसको व्यवहारमा भर पर्ने बताएका छन् ।
बुटबलमा आयोजित पत्रकार सम्मेलनमा प्रचण्डले भने, ‘अहिले हामी गठबन्धनमा छौं । तत्काल एमालेसँग गठबन्धनको सम्भावना छैन । तर, राजनीतिमा असम्भव केही हुँदैन ।’
उनले भनेका छन् ‘कांग्रेसका केही नेताले माओवादीसँग कुनै हालतमा गठवन्धन हुँदैन भन्ने खालका अतिवादी विचार राखिरहेका छन् तर प्रधानमन्त्री देउवाले अब उहाँहरुलाई बोल्न बन्द गर भन्नुभएको छ । यदि कांग्रेसले लखेट्न थाल्यो भने परिस्थिति के हुन्छ भन्न सकिन्न ।’
यद्यपि, आफ्नो पार्टीले आफ्नै तागतमा चुनाव लड्ने कुरालाई प्राथमितामा राख्ने उनको भनाइ छ ।
गठवन्धन होला र जितौंला भन्ने मनस्थितिमा नबस्न उनले कार्यकर्तालाई आग्रह गरे । प्रचण्डले चुनाव हुन्छ वा हुँदैन भन्ने संशयको अवस्था अझै व्याप्त रहेको पनि बताउदै यसबारेमा प्रधानमन्त्रीसँग छलफल भएको बताए ।
‘प्रधानमन्त्रीले भोट हाल्ने दिन पनि चुनाव हुन्छ कि हुँदैन भनिराख्छन्, नेपाल यस्तै हो भन्नुभयो,’ प्रचण्डले भनेका छन् । उनले चुनावमा आफ्नै संगठनलाई बलियो बनाएर जानुपर्ने बताए ।
