४ चैत्र, मकवानपुर ।
मकवानपुरको पश्चिमी क्षेत्र मनहरी गाउँपालिकामा यात्रुबाहक बस दुर्घटना हुँदा दुई जनाको घटनास्थलमै मृत्यु भएको छ ।
पूर्व–पश्चिम राजमार्गअन्तर्गत मनहरी–६ , भुल्चोकमा आज बिहान अनियन्त्रित भई हेटौंडाबाट चितवनतर्फ जाँदै गरेको ना ४ ख ४४५४ नम्बरको बस पल्टिएको हो ।
दुर्घटनामा सहचालक नुवाकोट, तारकेश्वर गाउँपालिका वडा नम्बर ४ घर भएका २२ वर्षीय सुवास श्रेष्ठ र बसमा सवार सोही ठाउँका २९ वर्षीय शम्भु दराई मगरको मृत्यु भएको इलाका प्रहरी कार्यालय मनहरीका प्रमुख प्रहरी निरीक्षक प्रकाश थापाले बताए ।
उनका अनुसार दुर्घटनामा परी ९ जना गम्भीर घाइते भएका छन् । उनीहरूलाई उपचारका लागि चितवनस्थित अस्पतालमा लगिएको छ । बस चालकलाई इलाका प्रहरी कार्यालय मनहरीले नियन्त्रणमा लिएको छ । बस अनियन्त्रित भएर पल्टिए पनि अरू कारण भने खुल्न नसकेको प्रहरी निरीक्षक थापाले जानकारी दिए ।
‘हेटौंडाबाट चितवनतर्फ जाँदै गरेको बस बिहान सवा ८ बजे दुर्घटना भएको हो । दुर्घटनामा परी दुई जनाको घटनास्थलमै मृत्य भयो । चालकलाई नियन्त्रणमा लिएर सोधपुछ गरिरहेका छौँ,’ थापाले भने, ‘बसमा कति यात्रु थिए भन्ने एकीन विवरण छैन । दर्जनभन्दा बढी घाइते भएका छन् । कति घाइते त आफैँ अस्पताल जानु भएको छ ।’
