एजेन्सी, २८ चैत । इन्डियन प्रिमियर लिग (आईपीएल) अन्तर्गत आइतबार भएका खेलमा राजस्थान रोयल्स र दिल्ली क्यापिटल्सले जित हात पारेका छन् । राजस्थान रोयल्सले लखनउ सुपर जायन्ट्समाथि ३ रनको रोमान्चक जित निकाल्यो ।
जितका लागि १६६ रनको लक्ष्य पछ्याएको लखनउ २० ओभरमा ८ विकेट गुमाउँदै १६२ रनमा समेटियो ।लखनउका क्विन्टन डि ककले सर्वाधिक ३९ रन बनाए । मार्कस स्टोइनिसले ३८ रनको योगदान गरे ।
राजस्थानका युजभेन्द्र चहलले एक्लै चार विकेट लिए । यस्तै ट्रेन्ट बोल्टले २ विकेट झारे । यसअघि मुम्बईमा टस हारेर ब्याटिङ गरेको राजस्थानले निर्धारित २० ओभरमा ६ विकेट गुमाउँदै १६५ रन बनायो ।
राजस्थानका शिम्रन हेटमायरले सर्वाधिक ५९ रन बनाए । देवदत्त पाडिक्कलले २९ रनको योगदान गरे ।जितसँगै राजस्थान ४ खेलमा ३ जित र १ हारसहित ६ अंक जोड्दै शीर्ष स्थानमा छ ।
लखनउ ५ खेलमा ३ जित दुई हारसहित पाचौँ स्थानमा छ । यस्तै अर्को खेलमा दिल्ली क्यापिटल्सले शीर्ष स्थानको कोलकाता नाइट राइडर्सलाई ४४ रनले पराजित गरेको छ ।
दिल्लीले दिएको २१६ रनको लक्ष्य पछ्याएको कोलकाताले १९ ओभर ४ बलमा सबै विकेट गुमाउँदै १७१ रन मात्र बनाउन सक्यो । कोलकाताका कप्तान श्रेयस एयरले सर्वाधिक ५४ रन बनाए । दिल्लीका कुलदिप यादवले ४ तथा खलिल अहमेदले ३ विकेट लिए ।
यसअघि पहिले ब्याटिङ गरेको दिल्लीले २० ओभरमा ५ विकेट गुमाएर २१५ रनको विशाल योगफल बनायो ।दिल्लीका डेभिड वार्नरले सर्वाधिक ६१ रन बनाउँदा पृथ्वी शले ५१ रनको योगदान गरे ।
यसैबीच आईपीएलअन्तर्गत आज सनराईजर्स हैदरावाद र गुजरात टाइटन्सबीच प्रतिस्पर्धा हुनेछ । खेल राति ७:४५ बजे सुरु हुनेछ ।
