विराटनगर, २९ चैत-विराटनगरबाट एक जना भारतीय नागरिकलाई मानव कंकालसहित प्रहरीले पक्राउ गरेको छ । मंगलबार सशस्त्र प्रहरीको सीमा सुरक्षा बल रानीबाट खटिएको प्रहरी टोलीले चेक जाँचका क्रममा खप्परसहित मानव शरीरका विभिन्न कंकालसहित भारतको पूर्णिया नगर पञ्चायतका २६ वर्षीय आदित्य सिन्हालाई पक्राउ गरेको हो ।
सिन्हालाई विराटनगर–१५ स्थित मुख्य रानी नाकाको १ नम्बर ढाटबाट कार्टुनमा मानव कंकालहरु लैजाँदै गरेको अवस्थामा पक्राउ गरिएको शसस्त्र प्रहरी बल बोर्डर आउट पोष्ट रानीका इन्चार्ज शसस्त्र प्रहरी निरिक्षक प्रभात गौतमले जानकारी दिए । ‘चेकजाँच गर्दा मानव खप्परसहित हातका औँलाका, नली खुट्टा सहित मानवको विभिन्न अंगका हड्डीहरु फेला प¥यो । हामीले नियन्त्रणमा लिएर नेपाल प्रहरीलाई बुझाएका छौँ ।’ उनले भने,‘पक्राउ परेका व्यक्ति भारतको पूर्णयाका हुन् । उनको साथबाट सन् २०१६ को वीपी कोइराला स्वास्थ्य विज्ञान प्रष्तिठानमा अध्ययन गरेको परिचयपत्र फेला परेको छ । यसको वास्तविकता बुझ्ने काम भइरहेको छ ।’
सिन्हाको साथबाट प्रहरीले एउटा मानव शरीरको खप्पर, खुट्टाको तीन वटा हड्डी फेला पारेको छ । त्यस्तै हातको ६, करङको ७, बंगराको एक, काँधको २, घाँटीको एउटा, हिपको एउटा, ढाड, औंला र कुरकुच्चाको ८÷८ वटा गरि जम्मा ४६ वटा मानव हड्डी बरामद गरेको छ ।
सिन्हाले भारतका संग्रहालय वा टुनामुना गर्ने व्यक्तिहरुलाई बिक्रिकालागि ती कंकाल लान खोजेको प्रहरीको आशंका छ ।
