सिराह, ११ वैशाख । सिरहामा सञ्चालित एसईई परीक्षाअन्तर्गत दोस्रो दिनको गणित विषयको परीक्षामा अमर्यादित कार्य गरेको भन्दै तीन केन्द्राध्यक्षसहित ८० जना परीक्षार्थीलाई निष्कासन गरिएको छ ।
चिट, फ्ल्याप र मोबाइल प्रयोग गरी परीक्षामा अमर्यादित कार्य गरेकाले उनीहरूलाई निष्कासन गरिएको जनाइएको छ । सञ्चारकर्मीसहित जिल्ला अधिकारी र सुरक्षा निकायका टोलीले अनुगमन गर्ने क्रममा परीक्षार्थीहरूले अमर्यादित गतिविधि गरेको पाइएकोले निष्कासन गरेको प्रमुख जिल्ला अधिकारी लालबाबु कवाडीले जनाए ।
परीक्षामा मर्यादाविपरीत कार्य गरेको भन्दै बस्तिपुर मावि लहान १३ केन्द्रबाट ३५, माध्यमिक विद्यालय लहान २० हनुमाननगर ब्रम्हानगोर्छारी परीक्षा केन्द्रबाट १९ र पडरीया थारुटोल मावि परीक्षा केन्द्रबाट २६ जना विद्यार्थी निष्कासन गरेको प्रमुख जिल्ला अधिकारी कवाडीले जानकारी दिए ।
प्रमुख जिल्ला अधिकारी कवाडीका अनुसार परीक्षार्थीले मोबाइल ह्वाट्सएप, फोटोकपी र चिट प्रयोग गरेकाले उनीहरूलाई आजको परीक्षाबाट निष्कासन गरिएको हो । परीक्षाको मर्यादा कायम गर्न नसकेकाले तीनवटै विद्यालका केन्द्राअध्यक्षहरू भोलिबाट परिवर्तन गरिने समेत कवाडीले जानकारी दिए । उनीहरूलाई आजको परीक्षाबाट मात्र निष्कासन गरिएको हो ।
यता माध्यमिक विद्यालय लहान २० हनुमाननगर ब्रम्हानगोर्छारीका केन्द्राध्याक्ष राजेन्द्र प्रसाद यादवले परीक्षामा सुरक्षाकर्मीहरूले नै चिट पुर्याउने कार्य गरेर परीक्षालाई अमर्यादिन बनाएको आरोप लगाए । उनले भने, ‘एक जना प्रहरीबाट हामीले चिट खोसेर त्यहाँ कार्यरत कमाण्डरलाई चिट बुझायौँ । तर, त्यसको केहीबेरमै फेरि चिट कक्षाकोठामा पुग्यो ।’
आफूहरूले परीक्षा मर्यादित बनाउन खोज्दाखोज्दै पनि सुरक्षाकर्मीकै असहयोगले यस्तो भएको यादवले दाबी गरे ।
वस्तिपुर मावि परीक्षा केन्द्रमा देव आइडल आवासीय विद्यालय लहान, लिटिलस्टार आवासीय विद्यालय, न्यू मनकामना आवासीय विद्यालय, सगरमाथा माध्यमिक विद्यालय र राजाजी माविका विद्यार्थीहरूले परीक्षा दिइरहेका छन् ।
त्यसैगरी, गोलबजार नगरपालिका- ३ जमदहस्थित सरस्वती माध्यमिक विद्यालय परीक्षा केन्द्रमा पनि व्यापक फेटोकपी प्रयोग गरेर चिट बनेको पाइएको छ । यस सम्बन्धमा छानबिन गरिने सम्बन्धित निकायले जनाएको छ ।
यो केन्द्रमा धनगढीमाई नगरपालिका- १० का सुनगाभा आवासीय मावि, नमुना प्राविधिक मावि गोलबजार, जेम्स अंग्रेजी वोर्डिङ स्कुल, शुभ श्री आवासीय मावि र आईजेभीएम आवासीय माविको परीक्षा केन्द्र रहेको छ ।
शिक्षा विकास तथा समन्वय इकाई सिरहाका प्रमुख रामवृक्ष महतोले विद्यार्थी निष्कासन भएको र केन्द्राध्याक्ष परीवर्तनबारे प्रमुख जिल्ला अधिकारीबाट जानकारीसहितको निर्देशन आएको जनाएको छ । यस वर्ष जिल्लाबाट १६२ विद्यालयका १० हजार ६ सय ४० जना छात्र–छात्रा एसईई परीक्षामा सहभागी भएका छन् ।
