२२ भदौ , एजेन्सी ।
पछिल्लो केही समय यता अमेरिका र चीनको चासोको केन्द्र बन्दै आएको नेपालमा अमेरिकी र चिनियाँ नेताहरुको भ्रमण बाक्लिएको छ । अमेरिकाको दक्षिण तथा मध्य एसियाली मामिला ब्युरो हेर्ने कार्यवाहक प्रमुख उपसहायक विदेशमन्त्री एलिजाबेथ होस्र्ट नेपाल आएकी छन् ।
काठमाडौंमा हुने जलवायु परिवर्तनसम्बन्धी कार्यक्रमका लागि उनी काठमाडौं आएको अमेरिकी दूतावासले जनाएको छ । ’आफ्नो भ्रमणको क्रममा उहाँ जलवायु परिवर्तनको क्षेत्रको हाम्रो साझेदारीमा केन्द्रित हुनुहुनेछ । पहिलो पटक आयोजना हुन लागेको क्लाइमेट एक्सन च्याम्पियन्स नेटवर्क सम्मेलनमा सहभागी हुनुहुनेछ,’ दूतावासले भनेको छ ।
पछिल्लो समय नेपालमा अमेरिका र चीनका उच्च पदाधिकारीहरुको भ्रमण बाक्लै गरि हुन थालेको छ । यस्तै आउँदो भदौ २७ गते चिनियाँ राष्ट्रिय जनकंग्रेसका अध्यक्ष ली चान्सु चार दिने नेपाल भ्रमणका लागि आउँदै छन् । रुस र मंगोलियाको भ्रमण सकेर काठमाडौं आउन लागेका लीको साथमा करिब १ सय जनाको टोली रहनेछ ।
चिनियाँ संसदको सभामुख लीको भ्रमण टोलीमा चिनियाँ कम्युनिष्ट पार्टी मन्त्रीस्तरका ६ जना, राज्यमन्त्रीस्तरका दुई जना नेता र विदेश मन्त्रालयका उच्च अधिकारीहरू रहनेछन् । त्यसबाहेक चिनियाँ कम्युनिष्ट पार्टीको विदेश विभागका सदस्यहरू पनि रहने बताइएको छ ।
सभामुख अग्निप्रसाद सापकोटाको निम्तामा आउन लागेका ली चिनियाँ कम्युनिष्ट पार्टीका वरिष्ठ नेतासमेत हुन् । सवैधानिक रूपमा राष्ट्रपति सी जिनपिङपछि दोस्रो वरियतामा रहेका ली पार्टीको प्रभावशाली राजनीतिक ब्युरोका सात सदस्यमध्ये एक हुन् ।
