३ असोज ,एजेन्सी ।
साफ महिला च्याम्पियनसिपको उपाधिका लागि नेपाल र बंगलादेश आज प्रतिस्पर्धा गर्दैछन् । साँझ पाँच बजे दशरथ रंगशालामा हुने फाइनल भिड्न्तपछि साफ महिला च्याम्पियनसिपले नयाँ च्याम्पियन पाउँदैछ । साफ महिला च्याम्पियनसिपको इतिहासमै पहिलो पटक नयाँ विजेता बन्दैछ । यसअघिका साफमा च्याम्पियन रहेको भारत छैटौँ संस्करणमा सेमिफाइनलबाटै बाहिरिएपछि नयाँ इतिहास बन्न लागेको हो ।
पाँचपटकको च्याम्पियन भारतलाई जारी प्रतियोगितामा पराजित गरेका दुवै टिमबीचको फाइनल भिड्न्त रोमाञ्चक हुने अपेक्षा गरिएको छ । समूह चरणमा बंगलादेशले भारतलाई ३–० गोल र सेमिफाइनलमा नेपालले भारतलाई १–० गोलले हराएका थिए । साफमा नेपालले पाँचौँ पटक फाइनल खेल्दैछ भने बङ्गलादेशको यो दोस्रो पटक हो ।
नेपाली महिला टोलीका प्रशिक्षक कुमार थापाले छैटौँ संस्करणको महिला साफ च्याम्पियनसिपको उपाधि घरमै राख्ने लक्ष्य रहेको बताएका छन् ।आजको फाइनल खेलमा नेपाललाई घरेलु मैदान र समर्थकको साथ रहने र यसले पनि जितका लागि मनोबल उच्च पार्ने प्रशिक्षक थापाको भनाइ छ ।
जारी महिला साफ च्याम्पियनसिपमा नेपाली महिला टिमले १२ वर्षमा आठौं पटक फाइनल खेल्दैछ । आजको खेलमा साफले नयाँ च्याम्पियन पाउँदा नेपाल त्यो इतिहासमा आफ्नो नाम लेखाउन चाहन्छ । नेपालले सेमिफाइनलमा पाँचपटकको च्याम्पियन भारतलाई पराजित गर्दै उपाधिमा बलियो दाबेदारी पनि प्रस्तुत गरिसकेको छ ।
यसअघि नेपालले भारतविरुद्ध १२ वर्षमा खेलेका ७ फाइनल गुमाएको थियो । ७ पटक उपाधि नजिक पुगेर पनि उपविजेतामै चित्त बुझाउनु प¥यो । अब १२ वर्षमा आठौं पटक फाइनलमा भिड्न लागेको नेपालका लागि सहज भने पक्का छैन । घरेलु मैदानको फाइदा रहेको नेपालले बंगलादेशको युवा र अनुभवी खेलाडीलाई सुक्ष्म तरिकाले नियाल्ने प्रशिक्षक थापाको भनाइ छ।
फाइनलमा नेपालकी स्टार फरवार्ड सावित्रा भण्डारी ‘साम्बा’ मैदान फर्कने विश्वास गरिएको छ । डेंगी सक्रमणका कारण साम्बाले श्रीलंकाविरूद्धको समूह चरणको अन्तिम खेल र भारतविरुद्धको सेमिफाइनल गुमाएकी थिइन् । नेपाली टिमलाई खड्किएको अर्को पक्ष भने साफको तयारीअघि अन्तर्राष्ट्रिय मैत्रीपूर्ण खेल खेल्न नपाउनु हो । बंगलादेशले भने नेपालमा साफ खेल्न आउनुअघि मलेसियासँग दुई वटा मैत्रीपूर्ण खेल खेलेको थियो ।
इतिहास हेर्ने हो भने नेपाली महिला टिमले बंगलादेशसँग कहिल्यै हारेको छैन । यस्तै नेपालले पनि जारी प्रतियोगितामा अहिलेसम्म गोल खाएको छैन । नेपालले समूह चरणको पहिलो खेलमा भुटानलाई ४–० र श्रीलंकालाई ६–० गोलले हराएको थियो । भारतलाई सेमिफाइनलमा १–० ले हराएको नेपालले अहिलेसम्म ११ गोल गरिसकेको छ ।
