२० असोज,एजेन्सी ।
उत्तर कोरियाले बिहीबार थप दुईवटा ब्यालेस्टिक क्षेप्यास्त्र प्रहार गरेको छ । पछिल्ला २ हप्तामा उत्तरले प्रहार गरेको यो छैटौँ क्षेप्यास्त्र हो । प्योङयाङले बुधबार आफ्ना परीक्षणहरूलाई अमेरिका र दक्षिण कोरियाको संयुक्त सैन्य प्रशिक्षणको जवाफ भएको बताएको थियो । मंगलबार उत्तर कोरियाले जापानी आकाशमाथि ब्यालिस्टिक क्षेप्यास्त्र प्रहार गरेको थियो ।
त्यसलगत्तै अमेरिकाले सुरक्षा परिषद्को आपत्कालीन बैठक बोलाएको थियो । बैठकमा अमेरिकाले उत्तर कोरियामाथि कडा नाकाबन्दी लगाउन रुस र चीनले रोकेको आरोप लगाएको थियो।बैठकमा मस्को र बेइजिङले प्योङयाङलाई ’व्यापक सुरक्षा’ दिने गरेको अमेरिकी राजदूतले बताए । चीन र रुसका प्रतिनिधिले भने दण्ड दिनुभन्दा संवाद बढाउनु राम्रो हुने बताए ।
उत्तर कोरियाले मंगलबार प्रहार गरेको क्षेप्यास्त्रको प्रतिक्रियामा बुधबार अमेरिका, जापान र दक्षिण कोरियाले युद्ध अभ्यासको आयोजना गरेका थिए । अमेरिकाले युद्ध अभ्यास र प्रतिबन्धित क्षेप्यास्त्र प्रहार बराबरीको कार्य हुन नसक्ने जनाएको छ । उत्तर कोरियाले भने त्यो अभ्यास शत्रुहरूबाट हुने आक्रमणको तयारीको प्रमाण भएको जनाएको छ ।
दक्षिण कोरिया र जापानले स्थानीय समयअनुसार बिहीबार बिहान ६ बजे प्रहार गरेको पहिलो क्षेप्यास्त्रले करिब १ सय किलोमिटर उचाई लिँदै करिब ३ सय ५० किलोमिटर दूरी पार गरेको जनाइएको छ । जबकि दोस्रो क्षेप्यास्त्रले करिब ५० किलोमिटरको उचाई लिँदै करिब ८ सय किलोमिटरको दूरी पार गरेको थियो ।
उत्तर कोरियाद्वारा गरिएको ब्यालेस्टिक मिसाइल परीक्षणको जवाफमा अमेरिकाले पनि अमेरिकाद्वारा निर्मित ’आर्मी टेक्टिकल मिसाइल सिस्टम’ नामक मिसाइल प्रक्षेपण गरेको थियो । यता युक्रेनलाई थप सैन्य सहयोग गर्ने अमेरिकी निर्णयबाट रुस रुष्ट बनेको छ ।
यसले अमेरिकासँग सीधा सैन्य भिडन्तको जोखिम बढाएको चेतावनी रुसले दिएको अन्तर्राष्ट्रिय सञ्चारमाध्यमले जनाएको छ । अमेरिकाका लागि रुसी राजदूत एनातोली एन्तोनोभले युक्रेनलाई सैन्यसहितका थप सहयोग गर्ने अमेरिकी घोषणा रुसका लागि तात्कालीक चेतावनी रहेको बताए ।
उनले अमेरिकालाई द्वन्द्वको एक भागिदारका रुपमा चित्रित गरेका हुन् । यसअघि अमेरिकाले रुससँग युद्धको सामना गरिरहेको युक्रेनलाई थप ६२५ मिलियन अमेरिकी डलर बराबरको सहयोगको घोषणा गरेको थियो ।
हतियारसहितको अमेरिकी सहयोगले रुसी कब्जामा रहेका क्षेत्र पुनः नियन्त्रणमा लिने अभियानमा रहेको युक्रेनलाई सहयोगी हुने अपेक्षा गरिएको छ ।युक्रेनी सेनाले उत्तर पूर्व र दक्षिणी क्षेत्रमा पछिल्ला हप्ता महत्वपूर्ण सफलता हाँसिल गरेका छन् । अमेरिकाले पछिल्लोपटक अत्याधुनिक रकेट सिस्टमसहितको सहयोग गर्न लागेको हो ।
रुसी राष्ट्रपति भ्लादिमिर पुटिनले युक्रेनमाथि युद्ध घोषणा गरेयता अमेरिकाले युक्रेनलाई करिब १७ बिलियन अमेरिकी डलर बराबरको सहयोगको वाचा गरिसकेको छ । रुसले गएको फेब्रुअरी २४ देखि युक्रेनमाथि आक्रमण गर्दै आएको छ ।
