५ मंसिर, एजेन्सी ।
दक्षिणपूर्वी एसियाली देश इन्डोनेसियामा गएको शक्तिशाली भूकम्पमा परी २० जनाको मृत्यु भएको छ भने तीन सयभन्दा बढी घाइते भएका छन् । ५.६ रेक्टर स्केलको भूकम्प गएको छ । यो भूकम्पले पश्चिम जाभा प्रान्तमा ठूलो क्षति पु¥याएको छ । भूकम्पको केन्द्रविन्दु पश्चिम जाभाको चियान्जुर सहर थियो ।
सरकारी अधिकारीले मृत्यु हुनेको संख्या पुष्टि गरेका छन् । सामाजिक सञ्जालमा शेयर भइरहेका भिडियोमा भूकम्पको समयमा भवनहरु हल्लिएको देखाइएको छ । अधिकारीहरूले चियान्जुरको भग्नावशेषबाट दुई जनालाई सकुशल निकालेको बताएका छन्। एक जनाको शव पनि फेला परेको छ । चियान्जुरका प्रहरी प्रमुख डोनी हर्मावानले एक महिला र एक बालकलाई जीवितै उद्धार गर्न सफल भएको बताएका छन् ।
उनले अहिले यसबारे जानकारी मात्र दिन सक्ने बताएको बीबीसीले उल्लेख गरेको छ । इन्डोनेसियाका स्थानीय सञ्चारमाध्यमले भूकम्पका कारण चियान्जुरमा धेरै भवन र छाना खसेको देखाएको छ । इन्डोनेसियाको मौसम विभागले यस क्षेत्रमा अझै भूकम्प आउन सक्ने चेतावनी दिएको छ ।
अधिकारीहरुले थप भुकम्प आउन सक्ने भएकाले सर्वसाधारणहरुलाई भवन वरपरको स्थानबाट टाढा रहन आग्रह गरेका छन् । मृतकको संख्या अझै बढ्न सक्ने बताइएको छ । भूकम्पमा परी धेरैजसो भग्नावशेषमुनि पुरिएकाहरु रहेका छन् ।
