११ फागुन, काठमाण्डौ ।
नयाँ राष्ट्रपतिका लागि उम्मेदवारी दिन दिने नजिकिदै गर्दा दलका नेताहरु घनिभूत छलफलमा जुटेका छन् । राष्ट्रपतिको उम्मेदवार तय गर्न केही साता अघि देखि सक्रिय बनेका एमाले अध्यक्ष केपी शर्मा ओली फुर्सदिला भएका छन् भने प्रधानमन्त्री प्रचण्ड, कांग्रेस सभापति शेरबहादुर देउवा र नेकपा एसका अध्यक्ष माधव कुमार नेपालको सक्रियता बढेको छ ।
बुधबार र बिहीबार विहानसम्म तीन दलका शीर्ष नेताबीच पटक पटक छलफल भएको छ । यही छलफलका क्रममा अहिलेको ७ दलीय गठबन्धन भत्काउने र ५ दलीय पुस १० कै गठबन्धन ब्युत्याउने अनौपचारिक सहमतिमा दलहरु पुगिसकेको नेताहरुले दावी गरेका छन् ।
यस्तो बेला पछिल्लो समय राष्ट्रपतिका लागि अधिक चर्चामा रहेका नेकपा(एकीकृत समाजवादी) का अध्यक्ष माधवकुमार नेपाल र प्रधानमन्त्री प्रचण्डबीच छलफल भएको छ । बिहीबार प्रधानमन्त्री समेत रहेका नेकपा(माओवादी केन्द्र) अध्यक्ष पुष्पकमल दाहालसँगको छलफल पश्चात् नेता नेपालले राष्ट्रपतिको आकांक्षी धेरै भएकाले कुनै एकको नाम लिन समस्या हुने बताएका छन् ।
नेता नेपालले उमेदवारको टुंगो लगाउन साँझ ४ बजे बैठक बस्न लागिएको जानकारी पनि दिएका छन् । माओवादी केन्द्रको संसदीय दलको कार्यलयबाट निस्कने क्रममा राष्ट्रपतिको उमेदवार को बन्छ भन्ने जिज्ञासामा उनले आकांक्षी धेरै भएको जवाफ दिएका हुन् ।
“ आकांक्षा राख्नेहरू धेरै छन् त्यसकारण हामी सहमतिमा पुग्न सकेका छैनौं तर, सहमतिको प्रयास भने भइरहेको छ,” उनले भने,“साँझ ४ बजे बैठक बस्दैछौं । त्यसपछि टुंगो हुन्छ ।” यस्तै प्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले अबको राष्ट्रपति पदमा यही फागुन १३ गतेसम्म सहमति हुने बताएका छन् ।
माधवकुमार नेपालसँगको छलफलपछि उनले यस्तो बताएका हुन् । “१३ गतेसम्म सहमति भइहाल्छ, पख्नुस् न,” उनले बैठकपछि भनेका छन् । फागुन १३ गते राष्ट्रपतिको उमेदवारी मनोनयन हुँदैछ । त्यसअघि नेताहरुले भेटघाटलाई तीव्रता दिएका छन् ।
यसअघि बुधबार साँझ प्रधानमन्त्री दाहालको सरकारी निवासमा कांग्रेस, नेकपा(एस) र माओवादीका शिर्ष नेताहरूको बैठकले पुरानै पाँच दलिय गठबन्धन ब्यूताउँने निर्णय भएको भनिएको छ तर प्रधानमन्त्री प्रचण्डले भने आजको माधव कुमार नेपालसँगको बैठकपछि सत्ता गठबन्धन टुटिनसकेको बताएका छन् ।
उनले नयाँ गठबन्धनका लागि सहमति भइनसकेको बताएका छन् । यस्तै नेकपा एमालेका अध्यक्ष केपी शर्मा ओलीले पनि पुस १० गते भएको सहमति कार्यान्वयन हुने दाबी गरेका छन् ।
कांग्रेसको सक्रियतामा पाँचदलीय गठबन्धन ब्युँताउन गृहकार्य सुरू भएको चर्चाका बीच ओलीले सत्ता गठबन्धन नटुट्ने दाबी गरेका हुन् । पुस १० गते ७ दलबीच प्रचण्डलाई प्रधानमन्त्री बनाउने गरी नयाँ गठबन्धन बनेको थियो । सोही दिन एमालेले राष्ट्रपति र सभामुख पाउने समझदारी बनेको एमालेले दाबी गर्दै आएको छ ।
