२४ चैत, एजेन्सी ।
चीन भ्रमणमा रहेका फ्रान्सेली राष्ट्रपति इम्यानुएल म्याक्रोन र चिनियाँ राष्ट्रपति सी चिनफिङबीच बेइजिङमा भेटवार्ता भएको छ । बिहीबार भएको सो भेटमा फ्रान्सका राष्ट्रपति म्याक्रोनले आफ्ना समकक्षी सीलाई रूसले सुरु गरेको युक्रेन युद्ध रोक्न आफ्नो प्रभावको प्रयोग गर्न आग्रह गरेका छन् ।
राष्ट्रपति म्याक्रोँको तीन वर्षभन्दा लामो समयपछि भएको चीनको राजकीय भ्रमणको स्वागत गर्दै राष्ट्रपति सीले बदलिँदो र अस्थिर अन्तर्राष्ट्रिय परिदृश्यका बाबजुद भएको भेटले रुस–युक्रेन युद्ध अन्त्यका लागि वातावरण बनाउने विश्वास विश्व समुदायले लिएको बताएका थिए ।
भेटमा दुवै नेताहरुले युद्ध र द्विपक्षीय सम्बन्धबारे कुरा गरेको बताइएको छ । सी र म्याक्रोन दुवै द्वन्द्वबाट आणविक हतियारको विषय टाढै रहनुपर्नेमा सहमत भएका अलजिजराले लेखेको छ । भेटपछि बेइजिङमा भएको संयुक्त पत्रकार सम्मेलनमा बोल्दै म्याक्रोनले युक्रेन कब्जामा रहेसम्म युरोपको सुरक्षा संरचना असम्भव रहेको बताएका छन् ।
उनले संयुक्त राष्ट्रसंघीय सुरक्षा परिषद्को एक सदस्य(रूस)ले राष्ट्रसंघीय बडापत्रको उल्लंघन गरेको भन्दै यो “अस्वीकार्य” रहेको बताएका छन् । यस्तै, सीले विश्व शान्तिको रक्षा गर्न दुई देशको क्षमता र जिम्मेवारी रहेको बताएका छन् । चीनले युक्रेन संकट नबढाउन अन्तर्राष्ट्रिय समुदायलाई आग्रह गरेको छ ।
युरोप बहुध्रुवीय विश्वमा स्वतन्त्र ध्रुव भएको र बेइजिङले यसको रणनीतिक स्वायत्ततालाई समर्थन गर्ने चीनले भनेको छ । यस्तै भेटवार्तामा म्याक्रोँले विगत केही वर्षदेखि चीन र फ्रान्सले द्विपक्षीय सम्बन्धमा सकारात्मक र सुदृढ वृद्धिको गति कायम राख्न मिलेर काम गरेको पनि बताएका छन् ।
दुवै पक्षले हाइब्रिड ढाँचामा उच्च आवृत्ति र उच्च गुणस्तरको रणनीतिक सञ्चार कायम गरेको, कोभिड–१९ विरुद्धको लडाइँमा एकअर्कालाई सहयोग गरेको, द्विपक्षीय व्यापारमा बलियो वृद्धि भएको र एअरोस्पेस, उड्डयन, कृषि, खाद्य र अन्य क्षेत्रमा सहयोगका महत्त्वपूर्ण परिणाम देखेको उनले बताएका छन् ।
यस्तै जलवायु परिवर्तन, जैविक विविधता र अफ्रिकाको विकासजस्ता विषयमा दुई देशबीच घनिष्ठ संवाद र समन्वय पनि भएको सीले सो क्रममा बताएका थिए । अहिले विश्व गम्भीर ऐतिहासिक परिवर्तनबाट गुज्रिरहेको उल्लेख गर्दै सीले चीन र फ्रान्स संयुक्त राष्ट्र सङ्घको सुरक्षा परिषद्का स्थायी सदस्य तथा स्वतन्त्रताको परम्परा बोकेका प्रमुख देश भएको उल्लेख गरे ।
म्याक्रोनले यो भेटवार्ता स्पष्ट र रचनात्मक भएको बताए । राष्ट्रपति म्याक्रोँको चीन भ्रमण विश्वसँग चीनको पूर्णरूपमा खुला आर्थिक सम्बन्ध सुरु भएपछि र सीको ‘दुई कार्यकाल’ को सफल समापनपछि तेस्रो कार्यकालको सुरुवातमा भएको हो ।
