७ वैशाख, काठमाण्डौ ।
विश्वका कैयौं देशमा फेरि एकपटक कोरोनाको संक्रमण तीव्र गतिमा बढ्न थालेको छ । कोभिड १९ मामिलाहरूमा संक्रमित बढ्नुलाई कोरोनाको नयाँ संस्करणहरू जिम्मेवार मानिएको छ। नयाँ भेरियन्टको नाम आर्कटुरस हो। यसलाई XBB.1.1 स्ट्रेन भनेर पनि चिनिन्छ । यो ओमिक्रोनको एक सव भेरियन्ट हो ।
यो भेरियन्ट हालसम्म सिंगापुर, अस्ट्रेलिया, बेलायत, अमेरिका र भारत लगायत २२ देशमा फैलिसकेको छ । विश्व स्वास्थ्य संगठन (डब्लुएचओ) ले २२ मार्चदेखि यसको निगरानी गरिरहेको छ । कोभिडका लागि डब्ल्यूएचओको प्राविधिक नेतृत्व डा मारिया भानले ‘केही महिनादेखि यो फैलिरहेको भन्दै यसबाट संक्रमितहरुमा गम्भीर स्तरमा परिवर्तन देखेको बताएकी छिन् ।
यो भेरियन्ट कोरोनाका दुईवटा भेरियन्ट मिलेर बनेको विज्ञहरू बताउँछन् । यो नयाँ भेरियन्टले रोग प्रतिरोधात्मक क्षमताको सुरक्षात्मक कवचलाई तोडेर पहिले नै कोरोना पोजेटिभ भइसकेका वा कोरोना भ्याक्सिन पाएका मानिसहरूलाई संक्रमित गरिरहेको छ भन्ने चिन्ताको विषय बनेको छ ।
कोरोनाको नयाँ भेरियन्टका लक्षणहरु अघिल्ला रूपहरू भन्दा पूर्ण रूपमा भिन्न छन्। विज्ञहरूका अनुसार कोरोनाको नयाँ रूपले विशेषगरी १२ वर्ष मुनिका बालबालिकामा नेत्रश्लेष्म रोग वा आँखा रातो हुने गरेको छ । बालबालिकालाई उच्च ज्वरो आउने, खोकी लाग्ने, आँखा रातो हुने, चिलाउने र आँखामा पानी आउने जस्ता समस्या हुन सक्छन् । आर्कटुरस को लक्षणहरू अन्य भाइरसहरू जस्तै हुन सक्छ ।
विज्ञहरूका अनुसार टाउको दुख्ने, घाँटी दुख्ने, नाक भरिने, ज्वरो आउने र मांसपेशी दुख्ने जस्ता लक्षण हुन सक्छन् । यसले बिरामीको पाचन प्रणालीलाई पनि असर गर्छ र पखाला लाग्न सक्छ। कोरोनाको नयाँ संस्करण अत्यधिक संक्रामक हुन सक्छ। वारविक विश्वविद्यालयका भाइरोलोजिस्ट प्रोफेसर लरेन्स यंगले द इन्डिपेन्डेन्टलाई भनेका छन् ,नयाँ भेरियन्टले ’हामी खतरामुक्त छैनौं’ र ’हामीले यसमा नजर राख्नुपर्नेछ’ ।
