२७ भदौ,एजेन्सी ।
अमेरिकी पूर्व राष्ट्रपति डोनाल्ड ट्रम्प विभिन्न आरोपमा महाअभियोगदेखि विभिन्न अदालती मुद्धा खेपिरहेको अवस्थामा अमेरिकी राष्ट्रपति जो बाइडेनविरुद्ध पनि महाअभियोग लाग्ने संभावना बढेको छ । अमेरिकी प्रतिनिधि सभाका सभामुख केभिन म्याकार्थीले राष्ट्रपति जो बाइडेनलाई भ्रष्टाचारको आरोप लगाउँदै महाअभियोग लगाउन आह्वान गरेका छन् ।
म्याकार्थीले पत्रकार सम्मेलन गर्दै आफूले सदन र समितिलाई राष्ट्रपति बाइडेनमाथि औपचारिक महाअभियोग अनुसन्धान गर्न निर्देशन दिएको बताएका हन् । हाउस ओभरसाइट कमिटीको अनुसन्धानले बाइडेन परिवारले भ्रष्टाचार गरेको फेला परेको बताएका छन् ।
रिपब्लीकनहरुले सन् २०२१ मा राष्ट्रपतिको पदभार ग्रहण गर्नु अघिदेखि बाइडेनका छोरा हन्टर बाइडेनको व्यापारिक कारोबारको अनुसन्धान गरिरहेका थिए । बाइडेनले शक्तिको दुरुपयोग गरेको र भ्रष्टाचार गरेकाले सभाले थप अनुसन्धान गर्न निर्देशन दिने बताए । बाइडेनमाथि आफ्ना छोराका लागि वैदेशिक व्यापारबाट सिधै लाभ लिएको आरोप छ ।
यद्यपि यो आरोप अहिलेसम्म पुष्टि हुन् सकेको छैन् । बाइडेन २०२४ को राष्ट्रपति पदमा निर्वाचनका लागि दौडिरहेका छन् । ८० वर्षीय राष्ट्रपति माथि महाअभियोग लगाउन सभामुखले भुमिका नखेले सभामुखबाट हटाउने पार्टीका नेताहरुले धम्की दिएका छन् ।ह्वाइट हाउस र डेमोक्रेटिक सांसदहरुले भने महाअभियोग राजनीतिक बदलाको रुपमा आएको बताएका छन् ।
महाअभियोगको समाना गर्नुपरे बाइडेनको राष्ट्रपतिमा दोहोरिने योजनामा प्रत्यक्ष असर पर्नेछ । बाइडेन र हन्टरविरुद्ध करमा गरिएको गढबढीको आरोपमा पनि अनुशन्धान भईरहेको छ । यसअघि २०२० मा पूर्व राष्ट्रपति ट्रम्पले युक्रेन र चीनमा पैसाको भ्रष्ट खेल खेलेको आरोप लगाएका थिए । हन्टर बाइडेन उपराष्ट्रपति रहदा एक युक्रेनी उर्जा कम्पनीको बोर्डका सदस्य रहेका थिए ।
