११ मंसिर,एजेन्सी ।
तेहरिक–ए–तालिबान पाकिस्तान (टीटीपी) ले चीनको बेल्ट एण्ड रोड विकास परियोजनामा आक्रमण गर्ने धम्की दिएको छ। त्यसो नगर्नका लागि उनीहरुले आयोजना लागतको ५ प्रतिशत ‘कर’ माग गरेका छन् । एक भिडियो सन्देशमा तालिवानको गन्डापुर गुटका कमाण्डरले चीन–पाकिस्तान आर्थिक करिडोर सम्बन्धी सडक र रेलमार्ग लगायतका पूर्वाधार परियोजनाहरू ध्वस्त हुने चेतावनी दिएको पाकिसतानी संचारमाध्यामहरुले उल्लेख गरेका छन् ।
पाकिस्तानको डेरा इस्माइल खानमा निर्माण मजदुरहरूलाई सम्बोधन गर्दै कमाण्डरले भनेका छन्, ’हाम्रो पाँच प्रतिशत कर जताततै छ।’ उनले कर नतिरे मेसिनरी र कर्मचारीलाई निशाना बनाइने चेतावनी समेत दिएका छन् । सन् २०१३ मा सुरु गरिएको बेल्ट एण्ड रोड इनिसिएटिभ चीनलाई बाँकी विश्वसँग जोड्ने नयाँ व्यापार मार्गहरू विकास गर्ने सी जिनपिङको महत्वाकांक्षी योजना हो।
अफगानिस्तान–पाकिस्तान क्षेत्रका सुरक्षा अनुसन्धान विश्लेषक अब्दुल सईदका अनुसार, ’टिटिपी भित्र जबरजस्ती फिरौती सामान्य अभ्यास भएको छ, जुन आफ्नो खर्च धान्न यस्तो पैसामा धेरै निर्भर छ।’ उनले थ पभनेका छन्, ’आतंकवादीहरूले अहिले मन्त्रालय, सरकारी अधिकारी, ठेकेदार र व्यवसायीहरूबाट पनि कर माग्न थालेको पछिल्लो प्रमाणले देखाएको छ।’
बीआरआईको रोड परियोजना चीनको पश्चिमी सिनजियाङ प्रान्तबाट सुरु हुन्छ र पाकिस्तानको दक्षिणपश्चिममा ग्वादर बन्दरगाहसँग जोड्छ। चीनको हितको रक्षा गर्न यहाँ हजारौं सुरक्षाकर्मी तैनाथ गरिएको छ । पाकिस्तानमा चिनियाँ इन्जिनियर र कर्मचारीमाथि आक्रमण भइरहेको छ ।
२०२१ मा दासु बाँध स्थलमा कर्मचारी बोकेको बसमा विष्फोट भएको थियो । जसका कारण नौ चिनियाँ कामदारसहित १२ जनाको मृत्यु भएको थियो । अफगानिस्तानमा तालिबान सत्तामा आएपछि पाकिस्तानको तालिवान (टिटिपी) पनि बलियो बनेको छ । त्यसयता पाकिस्तानमा लगातार आक्रमण बढ्दै गएको छ । यी आक्रमणहरू सिधै अफगानिस्तानको सिमानाबाट भइरहेका छन्।
