२२ मंसिर, एजेन्सी ।
इजरायल र अमेरिकी आक्रमणको धम्कीको सामना गर्दै इरानी राष्ट्रपति इब्राहिम अल रायसीले रुसको भ्रमण गरेका छन् । इरानी राष्ट्रपतिले बिहीबार रुसी राष्ट्रपतिसँग भेट गरेका थिए । पुटिन र राईसीबीचको भेट गोप्य रुपमा भएको र यसबारे कुनै वक्तव्य जारी गरिएको छैन ।
यस रहस्यमय भेटका बीच अमेरिकाले इरानले रुसबाट घातक हतियारको भण्डार किन्न चाहेका भन्दै चेतावनी दिएको छ । यी रुसी हतियारका आधारमा इरानले यस क्षेत्रलाई अस्थिर बनाउन आफ्नो शक्ति बढाउने अमेरिकाले जनाएको छ ।
इजरायल र हमासबीचको युद्धका कारण पुरै पश्चिम एसियामा निकै तनावपूर्ण वातावरण बनेको बेला इरानी राष्ट्रपतिले पुटिनसँग भेटवार्ता गरेका हुन् । अमेरिकाको राष्ट्रिय सुरक्षा परिषद्का प्रवक्ता जोन किर्बीले भनेका छन्, ‘हामीसँग विश्वास गर्ने कारण छ कि उनीहरू (इरान) केही घातक हमला गर्ने हेलिकप्टर, लडाकु विमान, मिसाइलहरू किन्न चाहन्छन्।
दुई देशबीचको रक्षा सम्बन्ध स्पष्ट रूपमा धेरै तीव्र गतिमा बढिरहेको छ। अतिरिक्त सैन्य क्षमता हासिल गर्ने इरानको जिद्धीपन पश्चिम एसियाका लागि निकै चिन्ताजनक रहेको उनले बताएका छन् । यसअघि इरानी अधिकारीहरूले रुससँग सैन्य सहयोग दिनप्रतिदिन बढ्दै गएको बताएका थिए ।
इरानले गत महिना रुससँग सुखोई–३५ लडाकु विमान, एमआई–२८ आक्रमण हेलिकप्टर र याक–१३० पाइलट प्रशिक्षण विमानका लागि सम्झौता गरेको बताएको थियो । तर इरानी नेता र पुटिनले भने यो बढ्दो सैन्य संलग्नताको बारेमा केही बताएका छैनन् ।
पुटिनले मध्यपूर्वको अवस्थाबारेको छलफल गर्न निकै महत्त्वपूर्ण रहेको बताएका छन् । यसमा प्यालेस्टिनी क्षेत्रको मुद्दा पनि विशेष महत्वपूर्ण छ। पुटिनको यो भनाइमा इरानी राष्ट्रपतिले प्यालेस्टाइन र गाजामा जे भइरहेको छ त्यो पक्कै पनि नरसंहार र मानवताविरुद्धको अपराध भएको बताएका छन् ।
इरानी नेताले अमेरिका र पश्चिमा देशहरूले यसलाई समर्थन गरिरहनु दुःखद भएको बताएका छन् । किर्बीले रातोसागरमा हुथी आक्रमणको पछाडि इरानको हात रहेको दोहोर्याएका छन् । उनले अमेरिकाले सामुद्रिक टास्क फोर्सलाई थप वृद्धि गर्न लागेको बताएका छन् ।
हुथीहरूले इजरायलले गाजामा आक्रमण बन्द नगरेसम्म क्षेप्यास्त्र र ड्रोन आक्रमण जारी राख्ने घोषणा गरेका छन्। इरानले यस सम्पूर्ण मामिलामा आफ्नो संलग्नता अस्वीकार गरेको छ।
