विराटनगर,भदौ २६
विराटनगरका दुई युवाले बाढीपीडित परिवारलाई खाद्यान्न सहयोग गरेका छन् । दुई साता अघि आएको बाढीबाट उठीबास भएका विराटनगर हाटखोलाका सुकुम्बासी अपाङ परिवारलाई युवाहरुले खाद्यान्न उपलब्ध गराएका हुन् ।
बाढीबाट घर भत्किएको तथा छोराछोरी समेत बाहिर रहेका कारण चारदिन अघिबाट भोकैभोकै बस्न बाध्य ६ अपाङता भएका परिवारलाई राहतस्वरुप खाद्यान्न उपलब्ध गराइएको युवा अभियन्ता पेरीस सुवेदीले जानकारी दिए । सो क्रममा उनीहरुले ६ परिवारलाई तीन महिना पुग्ने चामल ८ बोरा,दाल २० किलो,भुजा ४ पाकेट,चिउरा १२ किलो,नुन १० प्याकेटसहित बिस्कुट र चाउचाउ लगायतका खाद्यान्न सामाग्री उपलब्ध गराइएको हो ।
ती परिवारहरुको दयनीय अवस्था हेरेपछि आफुले फेसबुकमा फोटो सहित अवस्था शेयर गरेपछि विराटनगर १० का युवा सुमन प्रसाईले उपलब्ध गराएको ३५ हजार मुल्य बराबरको खाद्यान्न वितरण गरिएको सुवेदीले बताए ।
