१ फागुन , विराटनगर ।
राजनीतिक दलहरूले पूर्वराजालाई बदनाम गराउने काम मात्र गरिरहेको राष्ट्रिय प्रजातन्त्र पार्टी नेपालका अध्यक्ष कमल थापाले आरोप लगाएका छन् । राप्रपा नेपालको जिल्लास्तरीय प्रशिक्षण कार्यक्रममा सहभागी हुन वीरगञ्ज आइपुगेका अध्यक्ष थापाले यस्तो आरोप लगाएका हुन् ।
उनले प्रधानमन्त्री पुष्पकमल दाहाललाई चुनौती दिँदै भने, ‘प्रधानमन्त्रीज्यूमा हिम्मत छ भने एकपटक दरबार हत्या काण्डको उच्चस्तरीय छानविन समिति गठन गरेर छानविन गराउनुहोस्, स्वतन्त्र र निष्पक्ष ढंगले।’ उनले आयोजित पत्रकार सम्मेलनमा सरकारले दरबार हत्याकाण्डमा जोजो दोषी देखिन्छन् ती सबैलाई कानुनको कटघरामा ल्याउन चुनौती दिए ।
पूर्वराजा ज्ञानेन्द्रले पनि सत्यतथ्य बाहिर आओस् भन्ने चाहेकोसमेत थापाले बताए । ‘यहीँबाट सबै कुराको निराकरण पनि निस्किन्छ नत्रभने कसैको बदनाम गराउने काम नहोस्,’ उनले भने। उनका अनुसार अहिले राजनीतिक दलहरूबाट राजपरिवारप्रति आरोप–प्रत्यारोप लगाउने काम मात्रै भइरहेको छ ।
यसैबीच यता राजतन्त्रकै पक्षधर मेडिकल व्यवसायी दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाऔँ महाअभियान’ले आज फागुन १ गते पहिलो वार्षिकोत्सव मनाउँदै छ । वार्षिकोत्सव कार्यक्रम काठमाडौँको भृकुटीमण्डपमा आयोजना गरिएको छ । यसलाई प्रसाइँले ‘नागरिक मुक्तिको आन्दोलनको अन्तिम भाग’ भनेका छन् ।
दुर्गा प्रसाइँका पछिल्ला गतिविधिमा आफ्नो साथ रहेको कमल थापाले पनि बताउँदै आएका छन् । तर राजेन्द्र लिङ्देन नेतृत्वको राप्रपाले भने यो कार्यक्रममा सहभागिता नजनाउने बताएको छ । यस्तै स्वयं ज्ञानेन्द्र शाह पनि कार्यक्रममा उपस्थित नहुने भएका छन् । आजको कार्यक्रममा प्रसाईंले पूर्वराजा शाहका साथै राजावादी पार्टी राप्रपालाई निम्ता दिएका छन् ।
तर, पूर्वराजा शाह उनको कार्यक्रममा सहभागी नहुने उनको संवाद सचिवालयले जनाएको छ । पूर्वराजा शाह दुई दिनअघि नै चितवन पुगेका छन्। उनी चितवनको विभिन्न धार्मिक स्थलको भ्रमणका साथसाथै शुभेच्छुकहरूसँग भेटघाटमा व्यस्त छन् । चितवनमा नै पूर्वराजाको पूर्वनिर्धारित कार्यक्रम रहेकाले उनी प्रसाईंको कार्यक्रममा सहभागी नहुने निश्चित रहेको सचिवालयको भनाइ छ ।
प्रसाईंले पूर्वराजालाई बाराको सिमरामा भेटेर कार्यक्रमको निम्ताका साथै समर्थन खोजेका थिए । सो भेटपछि उनले पूर्वराजासँग अर्थपूर्ण संवाद भएको समेत बताएका थिए । यस्तै उनले राजतन्त्र फर्काउनका लागि फागुन १ मा कार्यक्रम गरेर आन्दोलन समेत गर्ने भनेर राप्रपाका नेताहरुसँग समर्थक जुटाउने प्रयास गरेपनि असफल भएका छन् ।
प्रसाईले सोहीअनुसार सोमबार राप्रपा अध्यक्ष राजेन्द्र लिङ्देनलाई भेटेर समर्थन खोजेका थिए । यस्तै उनले कार्यक्रममा समेत सहभागी हुन आग्रह गरेपनि उनले अस्वीकार गरेका थिए । राप्रपाका प्रवक्ता मोहन श्रेष्ठले प्रसाईंको कार्यक्रम र आन्दोलनमा पार्टीको संस्थागत सहभागिता नरहेको बताएका छन् ।
अहिलेकै अवस्थामा संस्थागत सहभागिता नरहेपनि राजतन्त्र फर्काउने आन्दोलनमा नैतिक समर्थन भने रहने उनको भनाइ थियो । यता केही हिन्दुवादी संगसंगठन र राप्रपाकै केही नेताहरुले पनि व्यक्तिगत रुपमा प्रसाईंलाई सघाउने बताउँदै आएका छन् । प्रसाईंले राजतन्त्रको पक्षमा वकालत गर्दै आएका छन् भने मिटरब्याज र लघुवित्त पीडितको मुद्दा पनि बोकेका छन् ।
प्रसाईंको राजतन्त्र फर्काउने एजेण्डा भएपनि राप्रपा भने संस्थागत रुपमा उनको गतिविधिप्रति सशंकित बन्दै आएको छ । यसअघि प्रसाइँले आजको कार्यक्रम टुँडिखेलमा गर्न लागेका थिए । तर गृहमन्त्री नारायणकाजी श्रेष्ठले प्रसाईंलाई आन्दोलनका लागि टुँडिखेल उपलब्ध गराउन नसकिने बताएको खुलेको छ । प्रसाईंका यसअघिका आन्दोलनमा पनि सरकारले बाक्लो संख्यामा सुरक्षाकर्मी खटाएको थियो भने झडपको स्थितिसमेत आएको थियो ।
