२ चैत ,एजेन्सी ।
गाजामा खानाको लाइनमा रहेका व्यक्तिमाथि इजरायली सेनाले हवाइ आक्रमण गरेको छ । शरणार्थी शिविर बाहिर खाना बाकेको गाडी पर्खिरहेकामाथि इजरायली सेनाले बम खसालेको छ । अधिकारीहरूका अनुसार घटनामा कम्तीमा २० जनाको घटनास्थलमै मृत्यु भएको छ । गाजाको स्वास्थ्य मन्त्रालयका अनुसार १५५ जना गम्भीर घाइते भएका छन् भने भागदौडका क्रममा अरु कयौँ व्यक्ति सामान्य घाइते भएका छन् ।
इजरायली सेनाले भने भीडमा रहेका व्यक्तिमध्ये केही हमास लडाकु रहेको र उनीहरूले इजरायली सेना लक्षित आक्रमणको प्रयास गरेपछि कारबाही गरेको दाबी गरेको छ । शरणार्थी शिविरमा खाद्यान्न लगायत सहयोग गरिरहेका व्यक्तिहरूले यसरी खानाको लाइनमा रहने व्यक्तिमाथि दैनिक आक्रमण भइरहेको बताएका छन् ।
इजरायली आक्रमणबाट गाजामा हालसम्म ३० हजार भन्दा बढीको मृत्यु भइसकेको छ । उता अवैधरुपमा युरोप जान लागेका दर्जनौ आप्रवासीले भोक र प्यासका कारण ज्यान गुमाएका छन् । अफ्रिकाबाट अवैधरुपमा लिबिया हुँदै युरोप जान लागेको आप्रवासी सवार कम्तीमा ६० जनाको मृत्यु भएको छ ।
सामुद्रिक क्षेत्रमा मानवीय सहायता गर्दै आएको एसओएस मेडिटेरेनियनले डुंगाबाट २५ जनाको जिवितै उद्धार गरेको छ । उद्धार गरिएका आप्रवासीका अनुसार लिबियाको उत्तरी तटस्थित जावियाबाट गत हप्ताको शुक्रबार उनीहरु युरोपका लागि प्रस्थान गरेका थिए । तीन दिनको यात्रापछि रबरको डुंगाको इन्जिन फेल भएको थियो ।
इन्जिन फेल भएपछि समुद्रमा अलपत्र परेको डुंगामा खाना र पानीको अभावमा यात्रुहरुको मृत्यु भएको अधिकारीहरुले जनाएका छन् । मृत्यु हुनेमा एक बालकसहित कयौँ महिलासमेत छन् । एसओएस मेडिटेरेनियनका अनुसार समुद्रमा डुंगा देखेपछि इटलीको कोष्ट गार्डको सहयोगमा उद्धार गरिएको हो । उद्धार गरिएका व्यक्तिहरुको स्वास्थ्यसमेत नराम्रोसँग बिग्रिएको छ ।
