२८ वैशाख, काठमाण्डौ ।
राष्ट्रपति र प्रधानमन्त्रीको विदेश भ्रमणका क्रममा झन्डै २ करोड रुपैयाँ खर्च भएको विवरण सार्वजनिक भएको छ । सरकारले राष्ट्रपति रामचन्द्र पौडेलको रद्द भएको युरोप भ्रमणको लागि मात्रै ५५ लाख २२ हजार रुपैयाँ भुक्तानी गरेको छ भने प्रधानमन्त्री पुष्पकमल दाहाल प्रचण्डको युगान्डा भ्रमणमा १ करोड २६ लाख रुपैयाँ खर्च भएको पाइएको छ ।
राष्ट्रपतिको कार्यक्रम रद्द भए पनि टिकट बुकिङ गरिसकेकाले अर्थ मन्त्रालयले सो रकम भुक्तानी गर्नुपरेको हो । राष्ट्रपति पौडेलले एक प्रतिनिधिमण्डल लिएर फ्रान्सको पेरिस पीस फोरम, जर्मनी र इटालीको भ्रमणमा जाने तयारी गरेका थिए । २०८० कात्तिक २२ देखि १० दिन युरोप घुम्ने उनको निर्धारित कार्यक्रम थियो ।
त्यसका लागि टिकटसमेत बुक भइसकेको थियो । तर, गत कात्तिक १७ गते जाजरकोटमा भूकम्प गएपछि राष्ट्रपतिले भ्रमण रद्द गरेका थिए । भ्रमण कार्यक्रम रद्द भए पनि टिकटको पैसा भने रिफन्ड नहुने भएकाले अर्थ मन्त्रालयले ५५ लाख २२ हजार भुक्तानी गरेको हो । बजेटबाट रकमान्तर गरेर यो भुक्तानी गरेको मन्त्रालयले जनाएको छ ।
भूकम्पले ठूलो जनधनको क्षति गरेका बेला राष्ट्रपति पौडेल युरोप भ्रमणमा जान लागेको भन्दै सामाजिक सञ्जालमा व्यापक आलोचना भएपछि उनले आफ्नो युरोप भ्रमण रद्द गरेका थिए । त्यसपछि पनि भूकम्प प्रभावित क्षेत्रमा गएका थिए । यस्तै अर्थ मन्त्रालयका अनुसार प्रधानमन्त्री प्रचण्ड नेतृत्वमा युगान्डाको राजधानी कम्पालमा आयोजित असंलग्न आन्दोलनका सदस्य राष्ट्रहरुको १९औं शिखर सम्मेलनमा सहभागी प्रतिनिधिमण्डलको भ्रमण खर्च १ करोड २६ लाख ६० हजार रुपैयाँ भुक्तानी भएको हो ।
अर्थले सो रकम परराष्ट्र मन्त्रालयका नाममा निकासा दिएको हो । प्रधानमन्त्री ४ माघमा युगान्डा प्रस्थान गरेका थिए । उनी ७ माघमा स्वदेश फर्किएका थिए । युगाण्डा भ्रमणको क्रममा उनले विभिन्न देशका सरकार प्रमुखहरुसँग उच्चस्तरीय भेटवार्ता गर्नुका साथै नाम सम्मेलनलाई सम्बोधन गरेका थिए । युगाण्डाबाट उनी कतारको दोहा हुँदै स्वदेश फर्किएका थिए ।
अर्थले सार्वजनिक गरेको विवरणमा उक्त रकम प्रधानमन्त्री प्रचण्डको नेतृत्वमा युगाण्डाको राजधानी कम्पालामा आयोजित नामको १९औं शिखर सम्मेलनमा सहभागी भएको नेपाली प्रतिनिधिमण्डलको भ्रमण खर्च बापत भुक्तानी गर्ने प्रयोजनार्थ परराष्ट्र मन्त्रालयको नाममा निकासा गरिएको जनाइएको छ ।
