नेपालको विश्वकप यात्रा कहाँसम्म पुग्ला ?

२१ जेठ, विराटनगर।

अमेरिका र वेष्टइण्डिजले संयुक्तरुपमा आयोजना गरेको आइसीसी टी–२० विश्वकप क्रिकेट शनिवारदेखि सुरु भएको छ । दुवै सहआयोजकले विजयी सुरुवात पनि गरिसकेका छन् । अमेरिकाले क्यानडालाई र वेष्टइण्डिजले पिएनजीलाई हराउँदा यता नामिबियाले पनि विजयी सुरुवात गरेको छ । नामिबियाले सुपर ओभरमा ओमानलाई हराएको हो ।

अबको केही बेरमा समूह डी को पहिलो खेलमा श्रीलंका र दक्षिण अफ्रिका खेल्दैछन् । अहिले सवा ८ बजे खेल सुरु हुनेछ । दोस्रो पटक टी–२० विश्वकपमा सहभागी भएको नेपालले भने मंगलबारबाट यो यात्रा सुरु गर्ने छ । मङ्गलवार नेदरल्यान्ड्ससँग खेल्दै नेपालले प्रतियोगिताको सुरुआत गर्नेछ । विश्वकपमा नेपाल समूह ‘डी’ मा छ ।

यो समूहमा नेपालसहित नेदरल्यान्ड्स, दक्षिण अफ्रिका, श्रीलङ्का र बङ्गलादेश छन् । आइसीसीको टी–२० वरियतामा दक्षिण अफ्रिका सातौँ, श्रीलङ्का आठौँ, बङ्गलादेश नवौँ स्थानमा छन् । नेदरल्यान्ड्स १५औँ स्थानमा रहँदा नेपाल १७ औँ स्थानमा छ । पाँच टीममध्ये दक्षिण अफ्रिका, श्रीलङ्का र बङ्गलादेश टेस्ट मान्यता प्राप्त राष्ट्र हुन् । नेदरल्यान्ड्स भने एसोसिएट राष्ट्रको सूचीमा शीर्ष स्थानमा छ । त्यसैले तुलनात्मकरुपमा नेपाल रहेको समूहलाई डेथ समूह मानिएको छ ।

बलिया प्रतिस्पर्धीहरू रहेकाले यो समूह अन्तर्गतका हरेक खेल नेपालका लागि चुनौतीपूर्ण हुनसक्छ । यद्यपी नेपालले पनि विश्वकपमा विजय हासिल गर्ने गरी उच्च मनोबलका साथ सहभागी हुने कप्तान रोहित पौडेलले बाचा गरेका छन् । नेपाली टोलीको कुरा गर्नुपर्दा कुशल भुर्तेल र आशिफ शेख नेपाली टोलीका खम्बाका रूपमा छन् । उनीहरूको प्रदर्शनले नै टोलीले आधार तय गर्ने खेल विश्लेषकहरूको भनाइ पाइन्छ ।

त्यसमा अनिल शाहले पनि राम्रो साथ दिन खोजेको देखिएको छ । अभ्यास खेलमा भइरहेको प्रयास हेर्दा प्रशिक्षक मोन्टी देसाईले यी तिनैजनालाई सुरुमै मैदानमा उतार्न पनि सक्नेछन् । तर दीपेन्द्र सिंह ऐरी टोलीमा फर्किएमा अनिलको स्थान निश्चित देखिँदैन । पछिल्लो समय अभ्यास खेलमा देखाएको प्रदर्शनलाई नियाल्ने हो भने ओपनरहरूको प्रदर्शन स्थिर हुन सकेको छैन । जुन प्रशिक्षक मोन्टीको लागि चिन्ताको विषय हुन सक्छ ।

नेपाललाई सधैँ टाउको दुखाई बन्दै आएको छ, ओपनिङ पार्टनरसिप । यदि ओपनिङ पार्टनरसिप मजबुद हुन सक्यो भने मध्यम क्रममा आउने व्याटरलाई प्रेसरभन्दा माथि उठेर खेल्न सजिलो हुन्छ । अहिले नेपालको ओपनिङ कुशल भुर्तेल र आसिफ शेखले गर्दा आएका छन् । एकाधबाहेक अधिकांश खेलमा नेपालको ओपनिङ राम्रो हुन सकेको छैन ।

एसीसी प्रिमियर कपमा हङकङ, युएई र साउदी अरेबियाविरुद्ध लगातार शून्य रनमा नेपालले पहिलो विकेट गुमाएको थियो । विश्वकपअघि ओपनिङसँगै नेपालका ब्याटिङ खासै चल्न सकेको छैन । हालैको कुरा गर्दा पनि कुशलले क्यानडासँगको अभ्यास खेलमा १० रन मात्र बनाएका थिए । आशिफले २२ रन बनाए । अफिसियल वार्म अप खेलमा अनिल शाहले धैर्यतापूर्वक खेल्दै ४७ रन बनाएका थिए ।

खेल अगाडि कुशल भुर्तेलको फर्म राम्रो देखिएको छैन । नेपाली टोलीको मुख्य चिन्ता यसैमा छ । तर कप्तान रोहित पौडेल भन्छनः “जे जस्तो भए पनि विश्वकप अघि ओपनिङ ब्याटिङमा कुनै परिवर्तन गरिनेछैन।” यस्तै दीपेन्द्र सिंह ऐरी खेलेमा कप्तान रोहित पौडेल तेस्रो नम्बरमा आउने पक्का जस्तै छ । मध्यक्रममा सन्दीप जोरा, कुशल मल्ल, दीपेन्द्रसिंह ऐरी र गुलशन झा छन् ।

तर अमेरिका प्रवेश गरेपछिको अभ्यास खेलहरूमा मध्य क्रमका खेलाडीहरूको प्रदर्शन ‘वाह’ भन्न लायकको नदेखिनुलाई चिन्ताको विषयका रूपमा हेरिएको छ । स्थानीय टोलीहरूसँग पनि नेपालको प्रदर्शन त्यस्तो उम्दा देखिएको छैन् ।विश्वकपका लागि अमेरिका उड्नु अगाडि नेपालमा खेलिएको वेस्ट इन्डिज ‘ए’ सँगको शृङ्खलामा खेलाडीहरूले दबाब झेलेको आभास मिलेको थियो ।

त्यहाँ एक्लै सङ्घर्ष गरेर शतक प्रहार गरेका कप्तान रोहितको ब्याट त्यसपछि भने खासै चल्न सकेको छैन् । नेपाली टोलीमा पक्का अलराउन्डरका रूपमा दीपेन्द्र सिंह ऐरी, गुलशन झा र कुशल मल्ल छन् । दीपेन्द्र टोलीका मुख्य खेलाडी हुन् । बलिङ, ब्याटिङ र फिल्डिङमा उनी चुस्त छन् । उनको प्रदर्शनमा नेपाली टोलीको नतिजामा फरक पर्ने देखिन्छ ।

वेस्ट इन्डिजको सेन्ट भिन्सेन्टमा घाइते भएका दीपेन्द्र नेदरल्यान्ड्ससँगको खेलमा उत्रने सम्भावना लगभग तय छ । सोमपाल कामी र करण केसी बलिङ अलराउन्डर हुन् । सोमपालले त १० औँ नम्बरमा ब्याटिङ गरेर कीर्तिमान नै बनाएका थिए । तर त्यो सन् २०१५ को कुरा हो । गुलशनको प्रदर्शनमा एक हदसम्म एकरूपता देखिएको छ । उनको दायाँ हाते मिडियम पेश र बायाँ हाते ब्याटिङले टिममा सन्तुलन बनाउन मद्धत पुग्नेछ ।

अर्को डेथ ओभर बलिङ पनि नेपालको टाउको दुखाई बन्दै आएको छ । डेथ ओभर स्पेशलिष्ट अभिनास बोहरा लगातार महँगो साबित हुँदा डेथ ओभरको बागडोर कसले सम्हाल्ने भन्नेमा चिन्ता थपिएको छ । क्यानडाविरुद्धको वार्मअप खेलमा पछिल्लो ३ ओभरमा नेपालले ५५ रन खर्चिएको थियो । फास्ट बलरको रूपमा रहेका सोमपाल कामी र करण केसी पनि डेथ ओभरमा चल्न सकेका छैन् ।

उनीहरूको बलले डेथ ओभरमा लाइन, लेन्थ र भेरियसन पाउन सकिरहेका छैनन् । एक समय बलिङ नै नेपाली टोलीको प्रमुख हतियार रहने गरेकोमा अहिले ब्याटिङ मजबुत हुन थालेको देखि सकिएको छ । तर बलिङ र फिल्डिङ क्षेत्र कमजोर नै भयो भन्ने पनि होइन । अझै पनि करण केसी र सोमपाल कामीसँग बलिङमा त्यो धार कायम नै छ । तर यो विश्वकप हो । उनीहरूले यो स्तरमा प्रदर्शन दिन अहिलेको भन्दा अझै राम्रो खेल्नु जरुरी देखिन्छ ।

नभए विश्वकपमा सहभागिता विर्सनलायक अवस्थामा पुग्दछ । एसिया कपमा भारतका विरुद्ध जस्तो नेपालले प्रर्दशन गर्याे त्यसमा अझ सुधारिएको प्रर्दशन गर्नसके कप्तान पौडेलको वचन पूरा गर्न मद्धत गर्नेछ । सन्दीप लामिछानेको अनुपस्थितिमा ललित नारायण राजवंशी र सागर ढकालले स्पिन आक्रमणको जिम्मा लिनेछन् । त्यसमा दीपेन्द्र र कुशल मल्लको साथ हुनेछ ।

कामचलाउ स्थितिमा कप्तान रोहित पौडेल र कुशल भुर्तेल पनि तयार छन् । ‘डेथ ओवर स्पेशलिस्ट’ अभिनाश बोहोराको बलिङको धार कस्तो हुन्छ भन्ने कुरालाई समेत धेरैले उत्सुकताका साथ पर्खिरहेका छन् । रन बढी बेहोर्ने भएकोले बेला बेला समर्थकहरूको आलोचनाको सिकार हुने गरेको ‘योर्कर किङ’ बोहोराले क्यानडासँगको ‘वार्म अप’ मा ‘लेन्थ’ समातेको महसुस भएको छ ।

तीव्र गतिमा कमल सिंह ऐरीको लागि यो प्रतियोगिता परीक्षा हुनेछ । कमल युवा छन् भने विपक्षीको लागि उनीहरूको बलिङ आक्रमण नौलो हुने हुँदा प्रशिक्षक मोन्टीले आवश्यक स्थितिमा मात्र उनलाई प्रयोग गर्न सक्नेछन् । कमल जस्तै प्रतिश जिसीले पहिलो रोजाइमा पर्नका लागि प्रतीक्षा गर्नुपर्ने हुनसक्छ । नेपालका यी खेलाडिहरुले आफ्नै समूहमा बलिया प्रतिस्पर्धिहरुको सामना गर्नु पर्ने छ ।

समूह डीमा पाँच राष्ट्रमध्ये बलियो राष्ट्र दक्षिण अफ्रिका हो । दक्षिण अफ्रिकाले एडेन माक्ररमको कप्तानीमा टोलीलाई मैदानमा उतारेको छ । दक्षिण अफ्रिकालाई उपाधि दाबेदारको रूपमा पनि हेरिएको छ । उसले लगातार राम्रो प्रदर्शन गर्दै आएको छ । नेपालले पहिलो पटक दक्षिण अफ्रिकाको सामना गर्दै छ । हालसम्म टी–२० विश्वकपको सबै संस्करणमा सहभागी भएको दक्षिण अफ्रिका २००९ र २०१४ मा भएको विश्वकपमा सेमिफाइनलसम्मको यात्रा तय गरेको थियो ।

यो पटक दक्षिण अफ्रिका समूह चरणमा शत प्रतिशत नतिजा निकाल्दै सुपर ८ मा पुग्ने सम्भावना देखिन्छ । दक्षिण अफ्रिकाको टोलीमा अनुभवी ब्याटर क्विन्टन डी कक, एडेन मार्करामदेखि बलिङतर्फ कागिसो रबाडाजस्ता विश्व स्तरीय खेलाडी समावेश छन् ।सोही समूहमा रहेका श्रीलङ्का र बङ्गलादेशको पछिल्लो समयको प्रदर्शन भने खासै राम्रो हुन सकेको छैन । टी–२० विश्वकपमा नेपालले बङ्गलादेशसँग दोस्रो पटक खेल्दै छ ।

२०१४ मा भएको टी–२० विश्वकपमा नेपाल बङ्गलादेशसँग ८ विकेटले पराजित भएको थियो । नेपालले श्रीलङ्कासँग पनि पहिलो पटक खेल्न लागेको हो । नेदरल्यान्ड्स नेपालको प्रतिस्पर्धी हो । यी दुई टोलीबिचको खेलमा मिश्रित नतिजा आउने गरेको छ । नेपालमा गत फेब्रुअरीमा भएको आइसिसी विश्वकप लिग–२ मा एकएक खेल जित्दा टी–२० सिरिजमा भने नेदरल्यान्ड्सले दुई र नेपालले एक खेल जितेका थिए ।

२०२२ मा भएको टी–२० विश्वकपमा नेपालबाहेकका सबै टोली सुपर १२ बाट बाहिरिएका हुन् । अब मंगलबार नेपालले पहिलो खेल अमेरिकाको डालासस्थित ग्राण्ड प्रेरी भ्यु क्रिकेट मैदानमा नेदरल्यान्ड्ससँग खेल्नेछ । दोस्रो खेल जुन ११ मा श्रीलङ्कासँग अमेरिकाको फ्लोरिडामा हुनेछ । त्यसपछि नेपाल वेस्ट इन्डिजतर्फ लाग्नेछ । वेस्ट इन्डिजको भिन्सेन्टमा जुन १४ दक्षिण अफ्रिका र जुन १६ मा बङ्गलादेशसँग खेल्नेछ । नेपाल पहिलो खेलमा नेदरल्यान्ड्समाथि जित निकाल्दै मनोबल उच्च बनाउन चाहन्छ ।

पछिल्लो समय टेस्ट राष्ट्रलाई समेत पराजित गरेको नेदरल्यान्ड्स पनि नेपाललाई पराजित गर्दै सुखद सुरुआत गर्ने दाउमा छ । ५ टीम रहेको समूह डीबाट शीर्ष दुई टोली सुपर ८ मा प्रवेश गर्नेछन् । सुपर ८ मा पुग्ने सम्भावना कायमै राख्न कम्तीमा दुई खेलमा जित अनिवार्य हुन्छ । दुई जितपछि पनि अन्य टीमको नतिजाले अर्को चरणको टुङ्गो लाग्नेछ ।

यसैबीच खेलकुद मन्त्री विराज भक्त श्रेष्ठले सामाजिक संजालमा एउटा भिडियो सन्देश जारी गर्दै टी–२० विश्वकप क्रिकेटलाई उत्सवका रूपमा मनाउन आग्रह गरेका छन् । मन्त्री श्रेष्ठले खेलाडीहरूको साथमा पूरा नेपाली तथा सरकार रहेको पनि बताएका छन् । उनले उच्च मनोबलका साथ विश्वकप खेल्न खेलाडीहरूलाई आग्रह गरेका छन् ।

नेपालले विश्वकपमा सहभागिता जनाएको बारेमा र अब कस्तो प्रदर्शन गर्नुपर्छ भन्ने बारेमा तपाइँका टिप्पणी पनि अवस्य व्यक्त गर्नुहोला ।ताजा खबरका लागि नेपाल टाइम्स्को अनलाइन पोर्टल डब्लु डब्लु डब्लु डट नेपाल टाइम्स् डट नेटमा गएर हेर्न सक्नु हुनेछ । यसैगरि हाम्रो युट्युव च्यानल र फेसबुक पेज पनि अवस्य भिजिट गर्नुहोला । तपाईले गर्नु भएको लाइक, कमेन्ट, सेयर र सब्क्राइबका लागि धेरै धन्यवाद । नेपाल टाइम्स् हेर्दै गर्नुहोला नमस्कार ।