८ भदौ, विराटनगर ।
चाडपर्व सुरु भएसँगै बजारमा चिनीको मूल्य उकालो लाग्न थालेको छ । चाडपर्वको बेला बजारमा चिनीको खपत बढी हुने मौका छोपेर होलसेल व्यवसायीले मूल्य वृद्धि गर्दा आम उपभोक्ता मारमा परेका छन् ।
थोक बिक्रेताहरूका अनुसार उत्पादक मिलहरूले नै मूल्य बढाएर पठाउँदा हाल बजारमा चिनीको खुद्रा मूल्य प्रति केजी ११५ रुपैयाँ भन्दा बढी पुगेको छ । व्यवसायीहरूका अनुसार चिनी किलोमा आठ रुपैयाँसम्मले वृद्धि भएको हो ।
सरकारी तथा निजी कम्पनीहरूले समेत चिनीको भाउ कस्न थालेका छन् । पहिले प्रतिकेजी १०५ रुपैयाँमा बिक्री गरिरहेको साल्ट ट्रेडिङमा केजीमा तीन रुपैयाँ बढेर १०८ रुपैयाँ भएको छ । होलसेल किराना पसलमा १०५ रुपैयाँ रहेको चिनीको भाउ बढेर प्रतिकिलो ११० देखि ११२ रुपैयाँसम्म पुगेको छ ।
स्वदेशी मिलसँग चिनी पर्याप्त नहुनु र सरकारले सुपथ मूल्यमा आयात गर्न नदिएपछि उपभोक्ताले महँगो तिरेर खरिद गर्नुपर्ने बाध्यता छ । नेपालमा वार्षिक २ लाख ५० हजार टन भन्दा बढी चिनीको माग छ । स्वदेशी उत्पादन एक लाख ७० हजार टनसम्म हुने गरेको छ ।
