२२ भदौ, विराटनगर ।
बार्सिलोना र पिएसजीका पूर्वफरवार्ड नेयमारले शनिबार बिहान विश्वकप छनोटअन्तर्गत इक्वेडरसँगको खेल खेलेनन् । विश्वकपको दक्षिण अमेरिकी छनोट खेलमा सर्वाधिक धेरै पाँच पटकको विजेता ब्राजिलले इक्वेडरमाथि संघर्षपूर्ण जित हासिल गरेको थियो ।
घरेलु मैदानमा भएको खेलमा ब्राजिलले इक्वेडरमाथि १–० को जित हासिल गरेको हो । ब्राजिलको जितमा रोड्रिगोको निर्णायक गोल गरेका थिए । रोड्रिगोले ३०औं मिनेटमा लुकास पाकेटाको पासमा गोल गरेका थिए ।
उक्त खेलमा ब्राजिलियन स्टार नेयमार उपलब्ध थिएनन् । ब्राजिलका लागि ७९ गोल गर्दै सर्वाधिक गोलकर्ता बनेका नेयमारले २०२३ मा विश्वकप छनोटका दुई खेल गुमाएका थिए । ती दुवै खेलमा ब्राजिल हारेको थियो ।
३२ वर्षीय नेयमारले शनिबारको गेम पनि गुमाए । विश्वकप छनोटकै खेलअन्तर्गत गत वर्षको अक्टोबरमा भएको भएको उरुग्वेविरुद्धको खेलमा चोट बोकेका नेयरमा झन्डै एक वर्षयता मैदानबाहिर छन् ।
बार्सिलोनाबाट सर्वाधिक धेरै सरुवा रकममा फ्रान्सेली क्लब पेरिस सेन्ट जर्मेन (पिएसजी) पुगेका नेयमार हाल साउदी अरेबियन हल हिलालसँग छन् । तर, अल हिलालका पछिल्ला ४५ खेलमा भने उनले खेल्न पाएका छैनन् । त्यसअघि पिएसजीमा हुँदा पनि उनले धेरै खेल चोटकै कारण गुमाउनुपर्यो ।
बार्सिलोनाका लागि पनि उनले अपेक्षानुरूप खेलहरू खेल्न पाएका थिएनन् ।
कहिले मैदान फर्किन्छन् त नेयमार ?
अल हिलालका अट्याकर नेयमारलाई हालै सम्पन्न कोपा अमेरिकाकै दौरान मैदान फर्किने अपेक्षा गरिएको थियो । तर, त्यो सम्भव भएन । साउदी क्लब हिलालका प्रशिक्षक जर्ज जेससका अनुसार नेयमारले पछिल्ला साताहरूमा निकै आफ्नो चोट निकै सुधार भएको महसुस गरेका छन् ।
तर पनि यो नोभेम्बरभन्दा अगाडि उनी पूर्ण रूप प्रशिक्षणलाई निरन्तरता दिन सक्ने अवस्थामा छैनन् । हल हिलाले आगामी सेप्टेम्बर ९ भित्र साउदी प्रो लिगमा आफ्ना खेलाडी दर्ता गराइसक्नुपर्ने छ । लिगको नियमानुसार टोलीमा आठ विदेशी खेलाडीमात्र समावेश गर्न पाइने छ ।
तर, हिलालसँग नेयमारसहित नौ विदेशी खेलाडी छन् । नेयमारले मैदान फर्कन समय लिइरहँदा क्लबले बाध्य भएर उनलाई टोलीबाहिर राख्नपर्ने हुन सक्छ ।
नेयमारले विश्वकप छनोटअन्तर्ग ब्राजिलका लागि खेल्ने अवसर पनि छ । आगामी नोभेम्बरमा हुने विश्वकप छनोटका खेलमा ब्राजिलले भनेजुएलासँग उसैको मैदानमा र उरुग्वेसँग घरेलु मैदानमा खेल्ने छ । उनी चाँडै निको भएमा यी खेलहरू खेल्न पाउने छन्, त्यसपछि क्लब फुटबलमा पनि उनको आगमन हुन सक्छ ।
सन् २०१० मा १८ वर्षको उमेरमा ब्राजिलका लागि डेब्यु गरेका नेयमारले ७९ गोलसमेत गरेका छन् । उनी ब्राजिलका सर्वाधिक गोलकर्ता पनि हुन् । ब्राजिलका लागि ७७ गोल गरेका पेलेजस्तो खेलाडीलाई उनले उछिनेका छन् । उनले सन् २०१६ मा भएको रियो ओलम्पिकमा घरेलु राष्ट्र ब्राजिललाई स्वर्ण पदक दिलाएका छन् ।
