२३ भदौ ,एजेन्सी ।
ओलम्पियन समेत रहेकी संगिना वैद्यले राखेप अन्तर्गत तालिम तथा प्रशिक्षण विभागको उपनिर्देशकबाट राजीनामा दिएकी छन् । यो संस्थामा निर्देशकका लागि दाबेदारसमेत रहेकी उनले अचानक किन राजीनामा दिइन् भने खबर अब नेपाल टाइम्स अनलाइन समाचारमा । आफ्नो वरियता मिचेर सरकारले जुनियरलाई निर्देशकमा नियुक्त गरेपछि राष्ट्रिय खेलकुद परिषद् (राखेप) अन्तर्गत तालिम तथा प्रशिक्षण विभागको उपनिर्देशकबाट संगिना वैद्यले राजीनामा दिएकी छिन् ।
शुक्रबार युवा तथा खेलकुद मन्त्रायलको ठाडो निर्देशनमा राखेप सदस्य सचिव टंकलाल घिसिङले कराँतेका प्रशिक्षक सोवित प्रसाईलाई तालिम तथा प्रशिक्षक विभागको निर्देशक नियुक्त गरेका थिए । यसैमा आपत्ति जनाउँदै संगिनाले पदबाट राजीनामा दिएकी हुन् । आइतबार वैद्यले राखेप सदस्य सचिव टंकलाल घिसिङलाई राजीनामा पत्र बुझाएकी छन् ।
‘यो निर्णय मप्रति गरेको अपमान भएर राजीनामा दिएको हो,’ संगिनाले भनिन् ‘नियम र कानुनअनुसार जाने हो भने मेरो पालो थियो । तर, यहाँ हस्तक्षेप गरेर मभन्दा जुनियर ल्याएपछि सोही पदमा बस्न ठिक लागेन।’ अघिल्लो साता सेवा निवृत्त भएपछि विभागका निर्देशक बक्सिङका वरिष्ठ प्रशिक्षक प्रचण्ड शर्माको विदाई भएको थियो ।
यसपछि उपनिर्देशक रहेका वैद्य र विष्णुबहादुर सिंहमध्ये एकको बढुवा हुनुपर्ने थियो । तर, मन्त्री तेजुलाल चौधरीले ठाडो हस्तक्षेप गर्दै कोशी प्रदेशबाट प्रसाईलाई नियुक्ती दिलाएका हुन् । प्रसाई मन्त्री चौधरीनिकट छन् । उनको कार्यकाल ६ महिनामा सकिँदै छ । त्यसअघि मन्त्रीले उनलाई निर्देशक बनाएका हुन् ।
राखेपबाट नियुक्ती पत्र लिएपनि उनी कार्यालय पुगेका छैनन् । सन् २००४ को ग्रिस ओलम्पिकमा छनोट चरण पार गर्दै ओलम्पिक खेल्ने संगिना पहिलो खेलाडी हुन् । सन् १९९९ मा काठमाडौंमा सम्पन्न आठौं दक्षिण एसियाली महासंघीय खेलकुदमा स्वर्ण पदक जितेपछि उनी राखेपको प्रशिक्षकका रुपमा कार्यरत छिन् ।
यदि निर्देशक पदमा नियुक्त भएको भए वैद्य तालिम तथा प्रशिक्षक विभाग प्रमुख बन्ने पहिलो महिला हुने थिइन् । निर्देशकको पद खाली भएपछि स्वभाविक रूपमा ओलम्पियन समेत रहेकी वैद्यको दाबी थियो । तर खेलकुद मन्त्री तेजुलाल चौधरीको निर्देशनमा कराते प्रशिक्षक सोभितराज प्रसाईंलाई निर्देशक बनाइएको हो । हाल निर्देशक नियुक्त भएका प्रसाईं भन्दा वैद्य एक वर्षले सिनियर प्रशिक्षक हुन् ।
