१४ मंसिर,काठमाण्डौ।
परराष्ट्रमन्त्री डा आरजु राणा देउवाले आज चिनियाँ विदेश मन्त्री वाङ यीसँग द्विपक्षीय भेटवार्ता गर्ने भएकी छिन् । चीनको छन्दु सहरमा यो भेटवार्ता हुनेछ । यसका लागि राणा हिजो नै चीनको छन्दु पुगेकी छन् । वाङ यीको मैत्रीपूर्ण निमन्त्रणामा औपचारिक भ्रमणका लागि उनी नेपाली प्रतिनिधिमण्डलको नेतृत्व गर्दै हिजो चीन प्रस्थान गरेकी थिइन् ।
मन्त्री राणालाई छन्दुमा चीनको विदेश मन्त्रालयको सिचुआन प्रान्तीय डेपुटी डाइरेक्टर जनरल लि हुछियाङ र चीनका लागि नेपाली राजदूत डा कृष्णप्रसाद ओलीले स्वागत गरेका थिए । उनले आज छेङ्दुस्थित नेपालको महावाणिज्य दूतावासको भ्रमण पनि गरेकी छन् ।
उनले वाणिज्य दूतावासका कर्मचारीहरु संग अन्तरक्रिया गरेको समेत बताएकी छन् । आगामी वर्ष औपचारिक द्विपक्षीय सम्बन्ध स्थापना भएको ७०औँ वर्षगाँठको अवसरमा दुवै सरकारले संयुक्त रूपमा घोषणा गरेको ‘नेपाल भ्रमण वर्ष २०२५’ को पृष्ठभूमिमा नेपाली पर्यटन प्रवर्द्धनका लागि जनताबीचको सम्बन्धलाई थप सुदृढ गर्न सम्भाव्यता खोज्न महावाणिज्य दूतावासलाई निर्देशन दिइएको उनले बताएकी छन् ।
चिनियाँ बजारमा चिया, कफी, औषधी र सुगन्धित जडीबुटी जस्ता नेपाली उत्पादनको प्रवद्र्धन गर्ने र छेन्दुमा रहेका सम्भावित नेपाली खानेकुराको पहिचान गर्न पनि निर्देशन दिइएको उनले बताएकी छन् । प्रधानमन्त्री केपी शर्मा ओलीको आसन्न चीन भ्रमणको तयारीस्वरुप उनी चीन गएकी हुन् ।
परराष्ट्र मन्त्रालयका अनुसार परराष्ट्रमन्त्री राणा पर्सि शनिवार काठमाण्डौ फर्कनेछन् । त्यसपछि प्रधानमन्त्री ओलीसँग यही मङ्सिर १७ गतेदेखि २१ गतेसम्म फेरि चीन भ्रमण गर्नेछिन् । ओली ४० सदस्यीय टोलीको नेतृत्व गर्दै चीन भ्रमणमा जाँदैछन् ।
आरजु र चिनियाँ विदेशमन्त्रीबीच आज हुने भेटवार्तामा प्रधानमन्त्री ओलीको भ्रमणका बेला हस्ताक्षर गर्ने तयारी गरिएको भनिएको ’बेल्ट एन्ड रोड इनिशटिभ’ (बीआरआई) कार्यान्वयनको खाकासम्बन्धमा चर्चा हुने ठानिएको छ ।
यद्यपि उक्त खाकामा सत्ताधारी दलहरू र नेपालभित्रै सहमति जुट्छ कि जुट्दैन भन्ने अझै निश्चित हुन सकेको छैन । मन्त्रीहरूले बताएअनुसार प्रधानमन्त्रीको चीन भ्रमण र भ्रमण दल स्वीकृत गरेको बिहीवारको मन्त्रिपरिषद् बैठकले समेत उनको चीन भ्रमणका एजेन्डाहरू स्वीकृत गरेको छैन ।
बैठकपछि सञ्चारकर्मीसँग बोल्दै संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले भने, “एजेन्डाबारे छलफल जारी नै छ । विभिन्न संयन्त्रहरू र छलफल गर्ने निकायहरूमा छलफल भइरहेको छ ।
एजेन्डा के बन्छ भन्नेबारे फेरि मन्त्रिपरिषद्को बैठक बसेर नै तय हुन्छ।“ बिहीवार चीन प्रस्थान गर्नुअघि परराष्ट्रमन्त्री राणाले काठमाण्डूस्थित त्रिभुवन अन्तर्राष्ट्रिय विमानस्थलमा सञ्चारकर्मीहरूलाई संक्षिप्त प्रतिक्रिया दिएकी थिइन् ।
त्यस क्रममा उनले बीआरआई कार्यान्वयनसम्बन्धी सम्झौतालाई लिएर सत्ताधारी दलबीच कुनै मतभिन्नता नरहेको दाबी गरिन् । उनले भनिन्, “यो मतभिन्नता मिडियाले बनाएको हो । पार्टीमा जति पनि नेताहरू हुनुहुन्छ, उहाँहरूले एकरूपताका साथ यस (बीआरआई) लाई अघि बढाउने भन्ने हाम्रो टीमले कुरा गरिरहनुभएको छ ।
त्यस्तो मतभिन्नता भन्ने भएको छैन।“ सञ्चारकर्मीहरूले उनलाई ’यसै पटक बीआरआई कार्यान्वयनसम्बन्धी सम्झौता हुनछ त?’ भनेर सोधेका थिए । त्यसको उत्तर दिँदै उनले भनिन्, “परराष्ट्र नीतिमा दुई देशबीच कुनै पनि कुरा हुँदा दुवै पक्षले आफ्नो कुरा राख्ने काम हुन्छ र त्यसमा धेरै वार्ता हुन्छन्। अब के हुन्छ हेरौँ।“
यता परराष्ट्र मन्त्रालयले पनि आज हुने दुई देशका परारष्ट्रमन्त्रीहरूको भेटवार्तामा द्विपक्षीय हितबारे छलफल हुने जनाएको छ । मन्त्रालयले जारी गरेको विज्ञप्तिमा भनिएको छ, “दुई नेताबीच दुई देशबीचको पारस्परिक हितका साथै प्रधानमन्त्री केपी शर्मा ओलीको आसन्न भ्रमणबारे विस्तृत छलफल हुने छ।“
