एजेन्सी, असोज १०
म्यानचेस्टर सिटी इंग्लिस फुटबल लिग (इएफएल) कपको चौथो चरणमा प्रवेश गरेको छ । इएफएल कप अन्तर्गत मंगलबार राति भएको तेस्रो चरणको खेलमा अक्सफोर्ड युनाइटेडलाई ३–० ले पराजित गर्दै सिटीले चौथो चरणका स्थान पक्का गरेको हो ।
अक्सफोर्डको घरेलु मैदान कासाम स्टेडियममा सिटीलाई जिताउन गाब्रियल जेसस, रियाद महारेज र फिल फोडेनले गोल गरे । एकपक्षीय बनेको खेलमा सिटीले ३६औं मिनेटमा जेससको गोलबाट खेलमा शुरुवाती अग्रता लिन सफल भएको थियो ।
पहिलो हाफमा १–० को अग्रता लिएको सिटीले दोस्रो हाफमा थप दुई गोल गर्न सफल भयो । ७८औं मिनेटमा रियाद महारेजले गोल गरेपछि सिटी खेलमा २–० ले अघि बढेको थियो । ९०औं मिनेटमा फिल फोडेनले गोल गर्दै सिटीलाई ३–० को सहज जित दिलाए ।