१४ फागुन, एजेन्सी ।
अनुशासन उल्लंघन गरेपछि मेजर लिग सकर (एमएलएस)ले इन्टर मियामीका कप्तान लिओनल मेसी र फरवार्ड लुइस सुआरेजलाई जरिवाना तिराएको छ । न्यूयोर्क सिटी एफसीका सहायक प्रशिक्षक मेहदी बलोचीको गर्धन थिचेकोे आरोपमा एमएलएसले मेसीलाई जरिवाना तिराइएको हो ।
यद्यपि, कति जरिवाना तिइएको हो भन्ने खुलाइएको छैन । शनिबारको भएको उक्त खेल २–२ को बराबरीमा सकिएको थियो । लगत्तै यो घटना भएको हो । खेलको अन्त्यमा रेफ्री अलेक्सिस सिल्भासँगको मौखिक विवादका कारण मेसीले पहेलो कार्ड पाएका थिए ।
मैदानबाट बाहिरिँदै गर्दा उनले न्यूयोर्कका सहायक प्रशिक्षक बलोचीलाई केही भनेका थिए । दुई मियामी सहायक प्रशिक्षकले हस्तक्षेप गरेपछि मेसी अघि बढे । तर, उनी फेरि बलोचीतर्फ फर्किएर र गर्धनमा समाएका थिए ।
यो कार्यले बलोचीलाई केही छिन स्तब्ध बने । यसैगरी मियामीका फरवार्ड सुआरेजलाई पनि सोही खेलमा हात अनुहार÷घाँटीमा लगाउने नीति उल्लंघन गरेको आरोपमा जरिवाना तिराइएको छ । सुआरेजले पहिलो हाफको अन्त्यपछि भएको झगडामा न्यूयोर्क डिफेन्डर बिर्क रिसाको गर्धन समातेका थिए ।
मेसी र सुआरेजले कारबाही भोगिरहँदा यता क्रिस्टियानो रोनाल्डोले भने आफ्नो कुल गोलसंख्यामा थप एक गोल एड गरेका छन् । साउदी प्रो लिगमा मंगलवार अल नासर क्लबले अल वाहिडलाई २–० ले पराजित गरेको छ ।
नासरको जितमा कप्तान क्रिस्टियानो रोनाल्डो तथा साडियो मानेले गोल गरे । पहिलो हाफ गोल रहित बराबरीमा सकिएको थियो । दोस्रो हाफको सुरुवातमा नै नासरले अग्रता लियो । ४८औं मिनेटमा नासरका कप्तान रोनाल्डोले गोल गरे ।
इन्ज्युरी समयको अन्तिममा मानेले पेनाल्टी मार्फत गोल गरेपछि नासार विजयी भयो । जितसँगै नासर २२ खेलमा ४७ अंकका साथ तेस्रो स्थानमा उक्लिएको छ । अल इत्तिहाद २१ खेलमा ५५ अंकका साथ शीर्ष स्थानमा छ ।
वाहिड २२ खेलमा १३ अंकका साथ रेलिगेसन जोनमा छ । उता स्पेनिस कोपा डेल रे सेमिफाइनलको पहिलो लेगमा बार्सिलोना र एट्लेटिको मड्रिडले बराबरी खेलेका छन् । मंगलवार भएको खेलमा ४–४ को बराबरी भयो ।
बार्सिलोनाको मैदानमा पाहुना टोलीका जुलियन अल्भारेज, एन्टोनियो ग्रिजम्यान, मार्को लोलरेन्ट र अलेक्जेन्डर सोर्लोथले गोल गरे । बार्सिलोनाका लागि भने पेड्रो, पाउ क्युबार्सी, इनिगो मार्टिनेज र रोबर्ट लेवान्डोस्कीले गोल गरे ।
रियल मड्रिड र रियल सोडिडाडबिच दोस्रो सेमिफाइनलको पहिलो लेग आज हुनेछ । यता प्रिमियर लिगमा पुछारको क्लब साउथह्याम्पटनलाई हराउँदै चेल्सी शीर्ष चारमा फर्किएको छ । गएराति स्ट्यामफोर्ड ब्रिजमा भएको खेलमा हारको सिलसिला तोड्दै चेल्सी शीर्ष चारमा फर्किएको हो ।
घरेलु मैदानमा भएको खेलमा चेल्सीले साउथह्याम्पटनलाई ४–० को फराकिलो अन्तरले हराएको हो । पहिलो हाफको २४औँ मिनेटमा क्रिस्टोफोर एनकुन्कुको गोलमा चेल्सीले सुरुवाती अग्रता बनाएको थियो ।
पेड्रो नेटोले गोल गर्दै चेल्सीको अग्रता दोब्बर पारेका थिए । लेवी कोलविलले तेस्रो गोल थपे । त्यसपछि मार्क कुकुरेल्लाको गोलमा चेल्सीले ४–० को फराकिलो जित दर्ता गरेको हो । जितसँगै चेल्सी अंक तालिकाको चौथो स्थानमा उक्लेको हो ।
चेल्सीले लिगको २७ खेलबाट ४६ जोडेको छ । एक खेल कम खेलेको म्यानेचेस्टर सिटी ४४ अंकमा तालिकाको पाचौँ स्थानमा छ । समान खेलबाट ४४ अंक बनाएको न्युक्यासल छैटौँ स्थानमा छ । गएराति भएको अर्को खेलका क्रिस्टल प्यालेसले ४–१ को जित दर्ता गरेको छ ।
यस्तै ब्राइटनले एएफसी बर्नमाउथलाई र फुल्हामले वुल्भ्सलाई समान २–१ गोल अन्तरले नै हराएका छन् ।
