२१ फागुन , काठमाण्डौ।
नेपालसंगै अन्तर्राष्ट्रिय बजारमा पनि सुनको मूल्य बढेको छ । अन्तर्राष्ट्रिय बजारमा सुनको मूल्य पुनः२९ सय डलर पार पुगेको छ । डलर कमजोर बन्दा र अमेरिकी राष्ट्रपतिले नयाँ ट्यारिफ लगाउने अडान लिदा व्यापार संकट गहिरिने सम्भावनाका कारण सुनको मूल्य वृद्धि भएको हो ।
आजको कारोबारमा सुनको मूल्य ०.७३ प्रतिशत अर्थात २१.१५ डलरले बढेको छ । यो वृद्धिसँगै सुनको मूल्य प्रतिऔंस २ हजार ९१२ डलरमा कारोबार भईरहेको छ । यो वर्ष सुनको मूल्य ११ प्रतिशतले बढिसकेको छ ।
सुनको मूल्यले यो वर्ष हालसम्मकै उच्च रेकर्ड कायम गरेको छ । गत फेब्रुअरी २४ मा सुनको मूल्य प्रतिऔंस २ हजार ९५६ डलर पुगेको थियो ।अमेरिकी राष्ट्रपति ट्यारिफ लगाउने विषयमा अडिग रहदा लगानीकर्ता सुरक्षित लगानीका लागि सुनप्रति आकर्षित भएका छन् ।
यस्तै अमेरिकी डलर इन्डेक्स पनि ०.६ प्रतिशतले घटेको छ । जसका कारण डलरको भाउ गत डिसेम्बर पछिकै न्यून विन्दुमा पुगेको छ । यसले डलरबाहेक अन्य मुद्राधारकलाई सुनको खरिद सस्तो पर्न गएको छ ।
आज चाँदीको मूल्य पनि बढेको छ । चाँदीको मूल्य ०.२८ डलरले बढ्दै प्रतिऔंस ३१.९७ डलर पुगेको छ । यता घरेलु बजारमा आज सुनको मूल्य प्रतितोला ९ सय रुपैयाँले बढेको छ ।
नेपाल सुनचाँदी व्यवसायी महासंघका अनुसार आज सुनको मूल्य प्रतितोला १ लाख ७० हजार ४ सय रुपैयाँमा कारोबार भईरहेको छ । अघिल्लो दिन भने सुनको मूल्य प्रतितोला १ लाख ६९ हजार ५ सय रुपैयाँमा कारोबार भएको थियो ।
त्यसदिन सुनको मूल्य प्रतितोला १४ सय रुपैयाँले बढेको थियो । आज चाँदीको मूल्य पनि बढेको छ । चाँदीको मूल्य आज प्रतितोला १० रुपैयाँले बढ्दै प्रतितोला १ हजार ९५० रुपैयाँ कायम भएको छ ।
अमेरिकी राष्ट्रपति डोनाल्ड ट्रम्पको नयाँ ट्यारिफ घोषणाले विश्वभर आर्थिक हलचल मच्चाएको छ। अमेरिका, चीन, क्यानडा र मेक्सिकोबीचको व्यापार तनाव चर्किँदै जाँदा लगानीकर्ताहरू सुरक्षित लगानीतर्फ आकर्षित भएका छन्, जसको प्रत्यक्ष प्रभाव अन्तर्राष्ट्रिय बजारमा सुनको मूल्यमा देखिएको छ।
ट्रम्प प्रशासनले क्यानडा, मेक्सिको र चीनबाट आयात हुने सामानमा थप महसुल लगाउने घोषणा गरेपछि व्यापार युद्धको संकेत स्पष्ट देखिएको छ।
मार्च ४ देखि लागू हुने नयाँ नियमअनुसार क्यानडा र मेक्सिकोबाट आयात हुने सामानमा २५% अतिरिक्त महसुल तथा चीनबाट आयात हुने सामानमा १०% नयाँ कर लगाइएको छ ।
यसको प्रतिक्रियास्वरूप, चीन र क्यानडाले पनि अमेरिकी उत्पादनहरूमा थप कर लगाउने घोषणा गरेका छन्। व्यापार युद्ध चर्किएसँगै विश्वभर वित्तीय अस्थिरता बढेको छ, जसले लगानीकर्तालाई सुरक्षित लगानीका रूपमा सुनतर्फ आकर्षित गरेको छ।
जब आर्थिक अस्थिरता बढ्छ, लगानीकर्ताहरूले स्टक मार्केट वा अन्य अस्थिर सम्पत्तिबाट पैसा झिकेर सुरक्षित लगानीतर्फ रुचि देखाउँछन्। सुन त्यसका लागि प्रमुख विकल्प हो।
ट्यारिफ घोषणापछि डलरमा कमजोरी देखिएको छ, जसले सुनको मूल्यलाई अझ माथि धकेलेको छ । यस्तै व्यापार युद्धले उत्पादन लागत बढाउने र मुद्रास्फीति उक्साउने भएकाले पनि सुनको भाउ उकालो लागेको विश्लेषण गरिएको छ ।
पछिल्लो केही दिनमा सुनको मूल्य १.५% ले वृद्धि भइसकेको छ। विश्वभरका सेयर बजारहरूमा गिरावट देखिएको छ, जसले थप सुनतर्फको आकर्षण बढाएको छ। लगानीकर्ता र अर्थशास्त्रीहरू अमेरिकी ट्यारिफको दीर्घकालीन असरबारे चिन्तित देखिएका छन् ।
यदि व्यापार युद्ध अझ चर्कियो भने, निकट भविष्यमा सुनको भाउ अझै बढ्न सक्ने सम्भावना छ। यो स्थितिमा लगानीकर्ताहरू सुरक्षित सम्पत्तिमा रुचि राख्ने भएकाले सुनको मूल्य आगामी दिनमा थप उतारचढाव हुन सक्ने आँकलन गरिएको छ।
