काठमाडौं,असोज २२
भुटानमा सम्पन्न साफं यू–१८ महिला फुटबल च्याम्पियनसिपमा नेपालले उपविजेतामै चित्त बुझाउनुपरेको छ ।
भुटानको चामलिमिथाङ राष्ट्रिय स्टेडियममा आइतबार भएको खेलमा नेपालले बंगलादेशसँग १–० गोलको हार बेहारेपछि नेपाल उपाधि जित्नबाट चुकेको हो ।
पहिलो हाफ दुवै टोली गोलरहित बराबरीमा रहेपनि दोस्रो हाफको सुरुवातमै बंगलादेशले अग्रता बनाएको थियो।
खेलको ४९औं मिनेटमा मसुरा प्रविनले गोल गर्दै टोलीलाई अग्रता दिलाएकी थिइन्। लामो फ्रिकिकलाई सदुपयोग गर्दै प्रविणले हेड गोल गरेकी थिइन्। एक गोलले पछि परेपछि नेपाली टोलीले आक्रामक खेल खेल्दै बंगलादेशलाई दबाबमा राखे पनि गोल भने गर्न सकेन।
समूहगत चरणको खेलमा पनि नेपाल बंगलादेशसँग २–१ गेलले पराजित भएको थियो। हारसँगै साफले पहिलोपटक आयोजना गरेको प्रतियोगिताको उपाधि जित्ने नेपालको लक्ष्य अधुरै रह्यो।
सेमिफाइनलमा भारतलाई टाइब्रेकरमा पराजित गर्दै नेपालले फाइनलमा स्थान बनाएको थियो। त्यस्तै समूह चरणको पहिलो खेलमा भने पाकिस्तानलाई १२–० गोलले पराजित गरेको थियो।
