१८ साउन , काठमाण्डौ ।
देशका विभिन्न भूभागमा लगातार भइरहेको अविरल वर्षा, त्यसले निम्त्याएको बाढी र पहिरोका कारण जनजीवन प्रभावित भएको छ । पहिरोले देशका मुख्य–मुख्य राजमार्गहरूलाई पूर्ण तथा आंशिक रूपमा अस्तव्यस्त बनाइदिएको छ ।
जसका कारण यात्रुहरू बाटैमा अलपत्र पर्ने स्थिति सिर्जना भएको छ । नेपाल प्रहरीले सार्वजनिक गरेको पछिल्लो विवरणअनुसार काठमाडौँ उपत्यकासहित कोशी, बागमती, गण्डकी र कर्णाली प्रदेशका अधिकांश महत्वपूर्ण सडक सञ्जालहरू गम्भीर रूपमा प्रभावित भएका छन् ।
सुरु गरौं राजधानी काठमाडौँलाई देशका अन्य भागसँग जोड्ने र उपत्यका आसपासका सडकहरूको वस्तुस्थितिबाट । ललितपुरको बागमती गाउँपालिका वडा नम्बर ३ पाण्डुर क्षेत्रमा गएको पहिरोले राजधानी छिर्ने तथा बाहिरिने एक महत्वपूर्ण वैकल्पिक मार्ग मानिने कान्ति लोकपथलाई पूर्णरूपमा अवरुद्ध बनाएको छ।
लगातारको वर्षाका कारण माटो बग्ने क्रम नरोकिएकाले त्यहाँ मर्मत कार्य तथा पहिरो पन्छाउने काममा ठूलो चुनौती थपिएको छ । यसैबीच, सम्भावित मानवीय क्षति र दुर्घटनालाई टार्न बागमती प्रदेशका अतिसंवेदनशील मानिने केही प्रमुख राजमार्गहरूमा रात्रिकालीन समयमा सवारी साधन सञ्चालन गर्न पूर्ण रूपमा निषेध गरिएको छ ।
प्रहरीले जनाएअनुसार काभ्रेपलाञ्चोक जिल्लामा पर्ने खुर्कोट–नेपालथोक–कटुञ्जेबेँसी सडक खण्ड अर्थात् बीपी राजमार्गमा बेलुकी ६ बजेदेखि बिहान ४ बजेसम्म कुनै पनि किसिमका सवारी साधन चलाउन पाइने छैन।
दिनको समयमा पनि अवस्थाको गम्भीरता हेरेर मात्र सीमित गाडीहरूलाई आवातजावत गर्न अनुमति दिइएको छ। ठीक यसैगरी, मकवानपुर जिल्लाको कान्ति लोकपथ अन्तर्गत पर्ने हेटौँडा–ठिङ्गन–बागमती–ललितपुर खण्डमा पनि सुरक्षा सतर्कता अपनाउँदै बेलुकी ५ बजेदेखि बिहान ५ बजेसम्म पूर्ण रूपमा सवारी बन्द गरिएको छ।
सिन्धुपाल्चोक जिल्लाको भोटेकोशी गाउँपालिकाअन्तर्गत पर्ने चारकिलो र कोदारी क्षेत्रमा गएको पहिरोले देशको उत्तरी व्यापारिक मार्ग अरनिको राजमार्गलाई ठप्प बनाइदिएको छ। यस क्षेत्रमा ठूला चट्टानहरू खसेका कारण यातायात सुचारु हुन अझै केही दिन लाग्न सक्ने अनुमान गरिएको छ।
उता, दोलखाको तामाकोशीस्थित किर्नेटार क्षेत्रमा आएको भीषण बाढीले लामासाँघु–रामेछाप राजमार्ग पूर्ण रूपमा अवरुद्ध भएको छ। यद्यपि, आम सर्वसाधारणलाई केही हदसम्म राहत दिनका लागि ‘खिम्ती ग्रामीण विद्युत् सहकारी संस्थाको कार्यालय’ को परिसरबाट वैकल्पिक मार्गको जोहो गरिदिएपछि यातायातको आंशिक व्यवस्था मिलाइएको प्रहरीले पुष्टि गरेको छ ।
यता रसुवाको उत्तरगयास्थित खाल्टेमा आएको बाढीले त्रिशूली–मैलुङ–स्याफ्रुबेँसी सडक खण्डलाई क्षति पुर्याएको छ । यो सडक पूर्ण क्षमतामा सञ्चालनमा आउन लामो समय लाग्ने देखिएको छ । अब चर्चा गरौं कोशी प्रदेशको भूभागको ।
भोजपुरको बोखिम क्षेत्रमा लामो समयदेखि मध्यपहाडी लोकमार्ग विभिन्न कारणले प्रभावित बन्दै आएको छ। त्यहाँ वैकल्पिक मार्गको जोहो गरेर हालका लागि सडकलाई ‘एकतर्फी’ मात्र सुचारु गराइएको छ।
यस्तै, इलामको राजदुवालीमा मेची राजमार्ग पूर्णरूपमा अवरुद्ध भए पनि अन्य सहायक मार्गको प्रयोग गरी सवारी चलाउने प्रबन्ध मिलाइएको छ । यसैक्रममा, तेह्रथुमको लालीगुराँस नगरपालिकास्थित काँडे क्षेत्रमा गएको पहिरोले मध्यपहाडी लोकमार्गलाई पुनः पूर्ण रूपमा अवरुद्ध पारेको छ।
गण्डकी प्रदेशका विभिन्न पहाडी जिल्लाहरूमा पनि पहिरोले वितण्डा मच्चाइरहेको छ। बागलुङको जैमिनीस्थित बेलबगरमा आएको पहिरोका कारण कालीगण्डकी करिडोर हाल ‘एकतर्फी रूपमा मात्र’ सञ्चालनमा आएको छ।
गोरखाको धार्चेस्थित अण्डर डाँडामा गएको पहिरोले लार्के–बेनीघाट कच्ची सडक पूर्ण रूपमा बन्द भएको छ। मनाङको नासो गाउँपालिकाअन्तर्गत पर्ने धारापानीमा गएको पहिरोले चामे–बेँसीसहर सडक खण्डको सम्बन्ध विच्छेद गराएको छ।
त्यस्तै, म्याग्दीको रघुगङ्गास्थित बैसेरी र लमजुङको बेँसीसहरस्थित खर्खरे भिरमा गएको पहिरोका कारण क्रमशः बेनी–जोमसोम र बेँसीसहर–मनाङ सडक खण्ड पूर्णरूपमा ठप्प भएका छन्। यसले हिमाली तथा पहाडी जिल्लाका स्थानीय बासिन्दा र पर्यटकहरूलाई अत्यन्तै अप्ठ्यारोमा पारेको छ ।
उता कर्णाली प्रदेशतर्फ नजर लगाउँदा, रुकुम पश्चिमको आठबीसकोटस्थित रिजेगार्ड खोलामा आएको बाढीले भेरी करिडोरको जाजरकोट–डोल्पा सडक खण्डलाई पूर्णरूपमा अवरुद्ध बनाइदिएको छ ।
यसले गर्दा कर्णालीका दुई जिल्लाबीचको स्थलमार्गको सीधा सम्पर्क टुट्न पुगेको छ । प्रहरी प्रशासनले देशका धेरैजसो स्थानमा अझै पनि वर्षा नरोकिएको र पहिरो जाने जोखिम उत्तिकै रहेकोले अत्यन्तै जरुरी नपरिकन लामो तथा जोखिमपूर्ण यात्रामा ननिस्कन सम्पूर्ण देशवासीमा अनुरोध गरेको छ ।
यदि यात्रा गर्नै पर्ने अवस्था आएमा प्रस्थान गर्नुपूर्व सम्बन्धित जिल्लाको प्रहरी कार्यालय वा ट्राफिक प्रहरीसँग सडकको ताजा अवस्था बुझेर मात्र निस्कन सुझाइएको छ । अवरुद्ध सडकहरूलाई खुलाउनका लागि सम्बन्धित निकायका डोजर, एक्साभेटर र मजदुरहरू निरन्तर खटिरहेका छन् ।
मनसुनी वायुको प्रभावका कारण भारी वर्षाको सम्भावना रहेका स्थानहरूमा नदीनाला तथा खोलाहरूमा पानीको सतह अचानक बढ्न सक्ने, पहिरो तथा भूक्षय जान सक्ने तथा यसले गर्दा जनजीवन, कृषि र यातायात क्षेत्र प्रभावित हुन सक्ने हुनाले सम्बन्धित क्षेत्रका बासिन्दा, यातायात चालक, यात्रु तथा सम्पूर्ण सरोकारवालाहरूले आवश्यक सतर्कता, सुरक्षा र पूर्वतयारी अपनाउन मौसम पूर्वानुमान महाशाखाले अनुरोध गरेको छ ।
यात्रा गर्दा, कृषिकर्ममा निस्कँदा वा नदी छेउछाउमा बसोबास गर्ने सम्पूर्ण सर्वसाधारण नागरिकलाई मौसमको जानकारी अद्यावधिक राख्न र आवश्यक पूर्वतयारीसहित विशेष सतर्कता अपनाउन आग्रह गरिएको छ ।
