इटहरी- रोटरी क्लब अफ इटहरीले बालबालिकाको आँखा परीक्षण तथा उपचार अभियान सुरु गरेको छ। विराटनगर आँखा अस्पतालको प्राविधिक सहयोगमा सञ्चालित अभियानअन्तर्गत पहिलो दिन इटहरी–७ स्थित लक्ष्मी माध्यमिक विद्यालयका १७९ जना विद्यार्थीको आँखा परीक्षण गरिएको कार्यक्रम संयोजक अन्जु शाक्यले जानकारी दिइन् । परीक्षणका क्रममा करिब १० प्रतिशत बालबालिकामा आँखासम्बन्धी समस्या देखिएको छ। समस्या देखिएका विद्यार्थीको थप परीक्षण तथा उपचार भदौ ६ गते इटहरी आँखा अस्पतालमा गरिने जनाइएको छ।
‘आँखाको समस्याका कारण कुनै पनि बालबालिकाको भविष्य अन्धकार नहोस्’ भन्ने उद्देश्यले अभियान सञ्चालन गरिएको रोटरी क्लब अफ इटहरीका अध्यक्ष चेतन धमलाले बताए । अध्यक्ष धमलाका अनुसार रोटरी क्लब अफ इटहरीले चालु रोटरी वर्षमा इटहरी तथा आसपासका क्षेत्रमा २२ वटा आँखा परीक्षण शिविर सञ्चालन गर्ने लक्ष्य राखेको छ। शिविरमा आँखाको परीक्षण गर्नुका साथै उपचार आवश्यक पर्ने बालबालिकाका लागि थप उपचारको समेत व्यवस्था गरिने उनले जानकारी दिए ।
रोटरी क्लब अफ इटहरीले विगतका वर्षहरूमा पनि शिक्षा, स्वास्थ्य, खानेपानी तथा वातावरणलगायतका क्षेत्रमा विभिन्न सामाजिक सेवाका कार्यक्रम सञ्चालन गर्दै आएको छ।
