विराटनगर : हत्या आरोपमा अनुसन्धानका लागि थुनामा रहेका दुई जना थुनुवाहरु प्रहरी हिरासतबाट भागेका छन् । विराटनगरका स्कुले विद्यार्थी मोहम्मद अस्फाकको हत्या आरोपमा असोज दोस्रो साता पक्राउ परेका मोहम्मद साद्दिन हुसेन र मोहम्मद आरिफ आलम इलाका प्रहरी कार्यालय विराटनगर रानीको थुनुवा कक्षको भेन्टिलेसन काटेर शुक्रबार राती भागेका हुन् ।,यो समाचार आजको उद्घोष दैनिकमा छापिएको छ ।
विराटनगर– १७ का मोहम्मद अस्फाकको अपहरणपछि हत्या गरेको आरोपमा पक्राउ परेका हुसेन र आरिफ थुनुवा कक्षको भेन्टिलेसनको ६ वटा रड काटेर फरार भएको प्रहरीले जनाएको छ ।शुक्रबार बिहान राती एक बजेदेखि २ बजेको समयमा भेन्टिलेसनमा रहेको ८ वटा मध्ये ६ वटा रड काटेर उनीहरु भगेको हुनसक्ने बताईएको छ ।
हुसेन र आरिफ फरार भएको शुक्रबार बिहान मात्र प्रहरीले थाहा पाएका थिए । हिरासत कक्षबाट थुनुवा भागेपछि डिउटीमा रहेका दुई प्रहरीलाई निलम्बन गरिएको छ । बिहीबार राती सात जना आलोपालो डिउटी बसेका थिए । सात जनालाई जिल्ला प्रहरी कार्यालय मोरङ तानिएको छ ।
रड काट्दा ठुलो आवाज आउँछ । तर, डिउटीमा रहेका प्रहरीकै सामुन्ने रड काटेर भाग्न मिलेमतो विना सम्भव नभएको प्रहरी स्रोत बताउँछ ।
गौतमबुद्ध स्कुल विराटनगरमा कक्षा १० मा अध्ययरत अस्फाक गत असोज १ गतेदेखि बेपत्ता भएका थिए । उनको शव असोज ७ गते ह्युमपाइपभित्र सडेको अवस्थामा भेटिएको थियो ।
