विराटनगर, पुस २०
नेपाल पत्रकार महासंघ मोरङ शाखाले २ जना पत्रकारसहित ३ जनालाई पुरस्कारसहित आज सम्मान गरेको छ । पत्रकार महासंघ मोरङको १३ औँ साधारणसभामा विकास पत्रकारिता पुरस्कार–२०७४ बाट पत्रकार ध्रुव भट्टराई र नेपाल पत्रकार महासंघले स्थापना गरेको प्रतिभा पुरस्कार–२०७४ बाट पत्रकार तारा आचार्यलाई सम्मान गरिएको हो ।
पत्रकार भट्टराई अनलाइनखबर र आचार्य न्यूज २४ टेलिभिजनमा आवद्ध छन् । त्यस्तै २२ वर्षदेखि पत्रकार महासंघ मोरङ शाखामा कार्यरत कार्यालय सचिव दिपक फुयाँललाई ५१ हजार रुपैँया नगदसहित सम्मान गरिएको छ । उनीहरुलाई कार्यक्रमका प्रमुख अतिथी तथा प्रदेश १ का आन्तरिक मामिला तथा कानुनमन्त्री हिक्मत कार्कीले नगरसहित सम्मान पत्र प्रदान गरे ।
कार्यक्रममा बोल्दै मन्त्री कार्कीले कुनै राजनितिक दलतिर नढल्की स्वच्छ र निष्पक्ष तरिकाले पत्रकारिता गर्न पत्रकारहरुलाई सुझाएका थिए । साधारणसभाकै अवसरकामा नेपाल मुद्रण उद्योग संघले स्थापना गर्ने पुरस्कारका लागि रु २ लाखको चेक पत्रकार महासंघ मोरङलाई हस्तान्तरण गरेको छ । कार्यक्रममा पत्रकार महासंघ मोरङका अध्यक्ष बन्धु पोखरेलले महासंघका ७ जना पुर्व अध्यक्षहरुलाई मायाको चिनो प्रदान गरेका थिए ।
