काठमाडौं, माघ २
वाइडबडि खरिद प्रकरणमा भएको अनियमिततामा सत्तारुढ दल नेकपा र प्रमुख प्रतिपक्षी दल नेपाली काँग्रसबीच आरोप प्रत्यारोप चलिरहेको छ । दुवै पार्टीका नेता तथा सांसदहरु आ–आफ्नो पार्टीको बचाउमा लागिरहेका बेला कांग्रेस नेता महेन्द्र यादवले वाइडबढि भ्रष्टाचार प्रकरणमा कांग्रेस सभापति शेरबहादुर देउवा दोषी नभएको जिकिर गरेका छन् ।
कांग्रेस सभापति शेरबहादुर देउवा प्रधानमन्त्री हुँदा वाइडबडी खरिदको निर्णय भएकाले देउवा पनि दोषी हुने नेकपाले दाबी गरिरहँदा कांग्रेस नेता यादवले भने देउवाको बचाउ गरेका हुन् ।
‘वाइडबडी खरिद प्रकरण केपी ओली पहिलो पटक प्रधानमन्त्री भएदेखि सुरु भएको हो । अहिले पनि ओली नै प्रधानमन्त्री पदमा रहेका बेला अनियमितता सार्वजनिक भएको छ । त्यसैले यसमा देउवाको संलग्नता छैन,’ कांग्रेस नेता यादवले भने ।
वाइडबडि भ्रष्टाचार प्रकरणमा दोषीलाई जोगाउनका लागि आयोग बनाइएको आरोप लगाउँदै नेता यादवले केपी ओली पनि नैतिक रुपमा दोषी भएको यादवको भनाइ छ ।
एक टिभी कार्यक्रममा बोल्दै नेता यादवले सरकारका संस्कृति पर्यटन तथा नागरिक उड्डयन मन्त्री रविन्द्र अधिकारी नै दोषी भएको जिकिर गरे । यता नेकपाका नेता केशव बडालले भने केपी ओली दोषी नभएको स्पष्ट पार्दै वाइडबडी खरिद प्रकरणमा जो दोषी देखिए पनि सरकारले कारबाही गर्ने आश्वासन दिए । बडालले छानविनका लागि आयोग गठन भएकाले उक्त आयोगले नै सत्य तथ्य पत्ता लगाएपछि सबै कुरा बाहिर आउने बताए ।
