विराटनगर, माघ ८
मोरङको बेलबारी स्थित लक्ष्मीमार्गमा मंगलबारबाट प्याब्सन मोरङको १० औँ खेलकुद महामेला (स्पोर्टस मिट २०७५) सुरु भएको छ । बेलबारी नगरपालिका वडा नं ११ स्थित लक्ष्मी खेलमैदानमा सुरु भएको महामेलाको प्रमुख अतिथि प्रदेश १ का प्रदेश प्रमुख प्रा.डा.गोविन्दबहादुर तुम्बाहाङले उद्घाटन गरेका छन् ।
प्रतियोगिताको उद्घाटन गर्दै प्रदेशप्रमुख तुम्बाहाङले खेलकुदले मानिसलाई अनुशासित बनाउने बताए । साथै उनले सबै प्रतियोगी विद्यार्थीहरुलाई शुभकामना समेत दिए । प्रदेशसभा सदस्य राजकुमार ओझाले मानव जीवनमा खेलकुदको उपयोगिताको बारेमा वताउँदै खेलकुद महामेलाको सफलताको शुभकामना दिए ।
उद्घाटन समारोहमा जिल्ला समन्वय समिति मोरङका प्रमुख नरेशप्रसाद पोखरेल, प्याब्सनका केन्द्रीय सल्लाहाकार टिकाराम पुरी, प्याब्सन प्रदेश नं १ का संयोजक नारायण घिमिरे, प्याब्सन मोरङका अध्यक्ष अर्जुन बस्नेत लगायतले विद्यार्थीमा खेलकुदको महत्व र खेलकुद महामेलाको सफलताको शुभकामना दिएका थिए ।
तीनदिनसम्म चल्ने प्रतियोगितामा मोरङका ८४ वटा संस्थागत विद्यालयको सहभागिता रहने प्याब्सन मोरङका अध्यक्ष अर्जुन बस्नेतले बताए । जिल्लास्तरिय स्पोर्टस मिटमा जिल्लाका २ सय ३८ प्याब्सन सदस्य विद्यालयहरुबाट १५ सय जना खेलाडीहरु प्रतिस्पर्धामा सहभागि हुने उनले बताए । प्रतियोगितामा विभिन्न दुरीका दौड र रेससहित लंगजम्प,हाइ जम्प,ट्रिपल जम्प सर्टपुट तथा ज्याभिल थ्रोका खेलहरु समावेश गरिएका छन । प्रतियोगितामा बिजयी हुनेहरुलाई प्रमाणपत्र,मेडल र ट्रफी प्रदान गरिने जनाइएको छ ।
