विराटनगर, माघ १०
विराटनगर रानीस्थित एक स्कुलको भ्यान आज विहान दुर्घटना भएको छ । विराटनगर १५ मा रहेको श्रीराम बोडिङ स्कुलको विद्यार्थी सवार म्याजिक भ्यान बिद्यालय आउने क्रममा दुर्घटनामा परेको हो ।
को १ च ७०३४ नम्बरको म्याजिक भ्यान सडक निमार्णका क्रममा सडकमा थुपारिएको माटोको ढिस्कोका कारण अनियन्त्रित भएर सडकमै पल्टिएको बिद्यालयका प्रिन्सिपल मनोजकुमार साहले बताए । दुर्घटनामा घाईते रहेका सवै ६ जना १० वर्षभन्दा कम उमेरका बिद्यार्थी रहेका छन् । जसमध्ये ४ जनाको अबस्था सामान्य भएपनि अन्य २ जनाको टाउकोमा गम्भीर चोट लागेको बिद्यालयले जनाएको छ ।
सात जना विद्यार्थीलाई लिएर स्कूलतर्फ जाँदै गरेको को १ च ७०३४ नम्बरको भ्यान स्कूलनजिकै आफैं अनियन्त्रित भएर सडकमा पल्टिएको प्रहरीले जनाएको छ । इलाका प्रहरी कार्यालय रानीका अनुसार दुर्घटनामा युकेजीमा अध्ययनरत सात वर्षीय कुनाल साह, कक्षा २ मा पढ्ने १० वर्षीय दिलनवाज अन्सारी, आठ वर्षीय कृष्ण राजवंशी, नौ वर्षीय मधार अन्सारी, कक्षा १ मा पढ्ने पाँच वर्षीय आयुष यादव र कक्षा ३ मा अध्ययनरत नौ वर्षीय पिपल राणापाल घाइते भएका छन् ।
घाईते विद्यार्थीहरुको विराटगरस्थित कोशी अञ्चल अस्पतालमा उपचार भईरहेको मोरङ प्रहरीले जनाएको छ । घाइतेमध्ये कुनाल र दिलनवाजको अवस्था गम्भीर रहेको प्रहरीले जनाएको छ । घाइते बालबालिकालाई स्थानीय बासिन्दा र प्रहरीले उद्धार गरेर उपचारका लागि अस्पताल पु¥याएका हुन् । प्रहरीले भ्यानमै सवार कक्षा ३ मा अध्ययनरत ब्युटी साह भने सकुशल रहेकी छन् । दुर्घटनामापछि स्कूल भ्यानका चालक विराटनगर १४ का वीरेन्द्र महतो फरार रहेका छन् ।
