धनुषा, माघ १२
धनुषाको सबैला नगरपालिकामा जन्ती बसमा ११ हजार भोल्टको करेन्ट लाग्दा मृत्यु भएका ६ जनाको शनाखत भएको छ । सबैला नगरपालिका–४ बाल्टियामा जन्ती बोकेर फर्किँदै गरेको ना ५ ख १७५२ नम्बरको लालिमा डिलक्स बसमा हिजोसाँझ करेन्ट लागेको थियो ।
करेन्ट लागेर मृत्यु हुनेमा सिन्धुली दुधौली नगरपालिका–४ का ९ वर्षीय बालक आक्रोश कुँवर, २० वर्षीय पूजा अधिकारी, १६ वर्षीया लीला अधिकारी रहेका छन् । यसैगरी धनुषा सबैला नगरपालिका–४ की केशमदेवी कुँवर, अन्दाजी ९ वर्षका बालक सुरज अधिकारीको घटनास्थलमै मृत्यु भएको छ ।
यस्तै गम्भीर घाइते दुधौली नगरपालिका वडा नम्बर ९ का रामबाबु अधिकारी दनुवारलाई अस्पताल र्पुयाएपछि चिकित्सकले मृत घोषित गरेका थिए । घटनामा जलेर घाइते भएकामध्ये केहीको अवस्था अझै पनि गम्भीर छ ।
घाइते सबैको उपचार जनकपुर अञ्चल अस्पतालमा भइरहेको छ । घाइते १० जनामा तीन बालबालिका, पाँचजना पुरुष र दुई महिला रहेका छन् । बसका सहचालक उदयपुर कटारीका पवन परियार गम्भीर घाइते भएका छन् । हिजो साँझ करीब ६ बजेतिर उक्त घटना भएको थियो ।
करीब ३ मिनेटसम्म बसमा आगोको झिल्का देखिएको प्रत्यक्षदर्शीहरूले बताएका छन् । विवाह भएका बेहुला र बेहुली अर्कै गाडीमा रहेकाले उनीहरू भने सकुशल रहेका छन् ।
